दरूहा मनला कोरोना झिन होवे... बड़ फिकर हे आबकारी विभाग ल, भट्टी बर नवा दिशानिर्देश जारी

अंजोर.रायपुर। छत्तीसगढ़ राज्य म कोविड संक्रमण के प्रसार ल देखत राज्य शासन डहर ले जारी दिशानिर्देश के अनुक्रम म आबकारी आयुक्त निरंजन दास डहर ले सबो जिला के देशी अउ विदेशी मदिरा दुकान बर निर्देश जारी करे गे हावय। मिले आरो के मुताबिक छत्तीसगढ़ स्टेट मार्केटिंग कॉर्परेशन के प्रबंध संचालक त्रिपाठी डहर ले तको सबो ज़िला प्रबंधक मनला शासन निर्देश के पालन करे बर केहे गे हावय।

जारी दिशा निर्देश के अनुसार म भट्टी म अवइया मन के बीच सोशल डिस्टनसिंग के कड़ाई ले पालन कराए जाये के निर्देश दिये गे हावय। मदिरा दुकान म कार्यरत सबो कर्मचारी मन अनिवार्य रूप ले मास्क पहने, समय समय म हाथ ल सैनिटाइज करे, दुकान ल भी समय समय म सैनिटाईज़ करे, आसपास साफ़ सफ़ाई कराने के निर्देश दे गे हावयं। यहू निर्देशित दे गे हावय के मदिरा केवल उही मनखे मन ल दे जाए जेन मास्क पहिन के आही। बिना मास्क वोल ल नइ मिले दारू।

राज्य शासन के निर्देश के अनुसार 45 साल ले जादा उमर के लोगन ल वैक्सीन लगवाये खातिर प्रेरित करे जाना हावय। इही अनुक्रम म मदिरा दुकान म जानकारी के प्रदर्शन करे जात हावय अउ लोगन ल वैक्सीन लगवाये बर प्रोत्साहित करे जात हावय। आबकारी विभाग के अधिकारी अउ कर्मचारी मनला दिशानिर्देश के कड़ाई ले पालन कराये के निर्देश दिये गे हावय।