गांव तनि तको कोरोना के पै दिखे म तुरते दवा दवाई देवा : दाउ भूपेश बघेल

    

अंजोर.रायपुर 23 अप्रैल 2021। मुख्यमंत्री भूपेश बघेल ह अपन निवास कार्यालय म आयोजित वीडियो कॉन्फ़्रेंसिंग के माध्यम ले सबो जिला पंचायत अध्यक्ष ले राज्य के ग्रामीण इलाका म कोरोना संक्रमण के स्थिति, ओकर रोकथाम अउ बचाव के उपाय के बारे म विस्तार ले चर्चा करिन अउ उंकर ले सुझाव मांगिस। मुख्यमंत्री ह किहिन के कोरोना संक्रमण के पिछू के लड़ाई हमन राज्य म सबो लोगन के भागीदारी ले जीते रेहेन। वर्तमान लड़ाई भी हम सावधानी अउ सबो लोगन के सहयोग ले जीतबो। ओमन किहिन के कोरोना संक्रमण के वर्तमान दौर जादा घातक हावय, हमन ल गजब सावधानी बरते के जरूरत हावय। 

ओमन ग्रामीण क्षेत्र म कोविड के प्रारंभिक लक्षण वाले लोगन के स्वास्थ्य विभाग डहर ले अनुशंसित दवा के सेवन तुरते शुरू कराए जाये के बात किहिन, ताकि कोरोना संक्रमण के गंभीर होए ले रोका जा सके। मुख्यमंत्री ह किहिन के स्वास्थ्य विभाग डहर ले राज्य के ग्रामीण अंचल म भी कोरोना के दवा के आपूर्ति शुरू कर दे गे हावय। स्वास्थ्य विभाग के मैदानी अमला अउ मितानिन मनके माध्यम ले लक्षण वाले मरीज मन ल पर्ची अउ दवा (कोविड किट) उपलब्ध कराये जात हावय। जेकर सेवन संबंधित लोगन पर्ची म लिखे मात्रा के मुताबिक कर सकही बइठक म गृह मंत्री ताम्रध्वज साहू, पंचायत अउ ग्रामीण विकास अउ स्वास्थ्य मंत्री टी.एस. सिंहदेव सहित सचिव स्तअर के अधिकारी अउ जिला पंचायत के अध्यक्ष मन जुरियाए रिहिन।