अतेक उदीम करे के बाद भी कोविड टीकाकारण म छत्तीसगढ़ सातवां नंबर म ...?

अंजोर.रायपुर। छत्तीसगढ़ कोविड 19 वैक्सीनेशन म पुरा देश म सातवां स्थान म हावय। राज्य म कुल जनसंख्या के 15.17 प्रतिशत लोगन ल, मतलब 44 लाख 49 हजार ले जादा ल वैक्सीन के पहिली डोज दे जा चुके हावय। राष्ट्रीय औसत 7.79 प्रतिशत हावय। केन्द्र शासित प्रदेश लक्षद्वीप, अंडमान निकोबार, लदाख के संग राज्य मन म सिक्किम,त्रिपुरा,हिमाचल प्रदेश केवल छत्तीसगढ़ ले आगू हावय। कल 18 अप्रैल तक के स्थिति म इहां 45 साल ले जादा उमर के लगभग 66 प्रतिशत लोगन ल पहिली डोज लग चुकी हावय। येकर अलावा 88 प्रतिशत हेल्थ केयर वर्कर, 91 प्रतिशत फ्रंट लाइन वर्कर ल भी वैक्सीन के पहिली खुराक दे गे हावय।

कोविड के दूसरइया लहर कतका घातक हावय येकर अंदाजा आम जनता ल हावय। फेर सरकार अउ ओकर अफसर मन ल थोरको नइये। पियास मरे के बाद कुआं खोदे वाले नीति के सेती कतकोन अपन परान गवां डरे हावय। जबकि सरकार कना पूरा एक बछर के बखत रिहिस सुविधा ल बढ़ाये के खातिर। खुदे सरकार अउ बड़का अफसर ल येकर आत्म मनन करना चाहि के कोनो नानकुन भूल नहीं बड़का गलती करे हावय, भला कोन लिही येकर जवाब देही।

पूरा एक साल बाद भी आम जनता तको थोरको नइ चेतिस। मन मरजी ले जिनगी के ठेला लगाये के सेती आज मउत के रेला लगे हावय। अतका सब कुछ होए के बाद आज भी लोगन चुप हावय। सरकार ले कोनो सवाल नइ पुछ हावय। जनता कना कोनो अफसर ल कुछ केहे के हिम्मत आखिर कब आही। मंत्री, विधायक, अफसर घर बइठे लाखों रूपिया के पगार डकारत हावय, जनता सवाल भले नी पूछत हाबे लेकिन चुनाव म येकर जवाब देना परही।