नगरीय प्रशासन मंत्री शिवकुमार डहरिया ह सहपरिवार लगवाइन कोरोना के टीका

अंजोर.रायपुर। नगरीय प्रशासन विकास अउ श्रम मंत्री डॉ. शिवकुमार डहरिया ह आज अपन विधानसभा क्षेत्र आरंग के सामुदायिक स्वास्थ्य केंद्र म पहुँचके कोरोना के वैक्सीन लगवाईस। मंत्री डॉ. डहरिया के कोविड-19 वैक्सीन कोविशील्ड के पहिली डोज लगे हावय, दूसरइया डोज 28 दिन के बाद लगाये जाही। मिले आरो के मुताबिक मंत्री डॉ. डहरिया ह किहिन के लोगन के कोरोना ले बचाव के खातिर टीका जरूर लगाना चाही। गंभीर बीमारी वाले लोगन जेकर इम्युनिटी कमजोर हावय, अउ जेकर उमर जादा हावय, ओला कोरोना संक्रमण के खतरा बना हावय। एला देखत शासन डहर ले फ्रंटलाइन वर्कर्स, 60 साल ले जादा के नागरिक अउ 45 साल ले 59 साल तक के को-मोरबिडिटी वाला के प्राथमिकता क्रम म फोकट म टीका लगाए जात हावय। मोर लोगन ले अपील हावय के पात्रता मुताबिक टीका अवश्य लगवाय।

मंत्री डॉ डहरिया ह बताइन के टीका लगाये के बाद ओला कोनो रकम के कोनो पेरशानी नइ होए हावय। ओमन लोगन ले अपील करे हावय के कोविड-19 संक्रमण के दिशा-निर्देश के सबो लोगन कड़ाई ले पालन करें, मास्क अनिवार्य रूप ले पहने, सेनेटाइजर ले हाथ धोते रहय, भीड़ वाले जगह म फिजिकल डिस्टेंसिंग के पालन करें। कुछ भी लक्षण दिखाई दे म स्वास्थ्य विभाग के सूचना दें अउ अपन कोविड जाँच अवश्य कराए। आप सबो के सहयोग ले ही हम कोरोना के हरा पाबो। मंत्री डॉ डहरिया के संग उंकर पत्नी श्रीमती शकुन डहरिया अउ परिवार के आन सदस्य मन ह तको टीका लगवाइन।