रक्षामंत्री राजनाथ सिंह फोन म छत्तीसगढ़ के कोरोना संक्रमण के स्थिति के आरो लीस

अंजोर.रायपुर। भारत के रक्षामंत्री राजनाथ सिंह ह फोन म राज्यपाल सुश्री अनुसुईया उइके ले चर्चा करके प्रदेश म कोरोना संक्रमण के स्थिति अउ वैक्सीनेशन के स्थिति के जानकारी लीस। ओमन किहिन के प्रदेश म कोविड संक्रमण के स्थिति ल देखत ए संकट ले निपटने के बर प्रदेश म रहत सेना के भूतपूर्व चिकित्सक, नर्स, लैब टैक्नेशियन अउ भूतपूर्व सैनिक मनके सेवा ले जा सकत हावयं। येकर संग ही संग स्काउट गाईड, एनएसएस के स्वंयसेवक, एनसीसी केडेट के भी सेवा ले जा सकत हावय। रक्षामंत्री ह किहिन हावय के ए संबंध म प्रदेश के मुख्यमंत्री ले चर्चा करे अउ ओला ए सुझाव ले अवगत करावें। 

येकर पाछू राज्यपाल सुश्री अनुसुईया उइके ह प्रदेश के मुख्यमंत्री भूपेश बघेल ले फोन म चर्चा करके रक्षामंत्री के ये सुझाव अउ निर्देश ले अवगत करात किहिन के सेना ले सहयोग बर इंकर प्रमुख मनके संग वर्चुअल मीटिंग लेके सुझाव ले जाए ताकि प्रदेश म कोरोना संक्रमण ले उत्पन्न संकट ले निपटने म मदद मिल सके। मुख्यमंत्री भूपेश बघेल ह किहिन के भूतपूर्व सेना कर्मी के कोरोनो संकट काल म सहयोग ले के सुझाव बहुत अच्छा हावय अउ संकट के स्थिति ले निपटने म उपयोगी हो सकत हावय। राज्यपाल सुश्री उइके ह मुख्यमंत्री श्री बघेल ले भूतपूर्व सैनिक अउ सैन्य सेवा म डॉक्टर मन के संग लघियात वर्चुअल बइठक आयोजित करके सहयोग के कार्ययोजना तइयार करके प्रभावी रूप ले क्रियान्वयन कराये के बात किहिन हावय।