प्रदेश म कोरोना संक्रमण के दयनीय स्थिति बर भाजपा नेता मनके घर म धरना

अंजोर.रायपुर, 24 अप्रैल 2021। देस म चारों मुड़ा कोरोना के सेती हाहाकार मचे हावय। कोनो ल अस्पताल म ठउर नइ मिलत हावय त कोनो ल राशन पानी, ऊपर ले लॉकडाउन। दवई अउ आक्सीजन के संग ही मरे के बाद तको मरघट्टी म लाइन लगाना वाकई गंभीर हावय। सरकार के इही सब परेशानी के सेती छत्तीसगढ़ भारतीय जनता पार्टी ह अपन-अपन घर म धरना प्रदर्शन करत हावय। 

प्रदेश के पूर्व मुख्यमंत्री डॉ. रमन सिंह ह ट्वीट करके अपन घर म धरना करे के आरो दे हावय। ओमन किथे के प्रदेश म कोरोना संक्रमण के दयनीय स्थिति हावय अउ प्रबंधन के नाम म सीएम भूपेश बघेल के नेतृत्व म केवल अव्यवस्था बगरे हावय। आज निवास म इही सब परिस्थिति मनके विरोध म धरना प्रदर्शन करे जात हावय। ये मउका म डॉ. रमन सिंह के संग पूर्व मंत्री राजेश मूणत अउ अभिषेक सिंह तको शामिल रिहिन। भाजपा के कहना हावय कोरोना नियंत्रण म छत्तीसगढ़ सरकार हर मोर्चा म विफल हावय। वइसे ये राजनीति करे के बखत नइये तभो ले सबो ल अपन बात रखे के अधिकारी हावय अउ विपक्ष के जिम्मेदारी हावय के सरकार के कमी ल बताना।