केंद्रीय शिक्षा मंत्री 12 वीं के परीक्षा खातिर सबो राज्य ल लिखिस चिट्ठी, राजनाथ सिंह के अध्यक्षता म होही बइठक

अंजोर.नई दिल्ली ए 22 मई 2021। बारहवीं कक्षा के परीक्षा अउ व्यावसायिक पाठ्यक्रम के खातिर प्रवेश परीक्षा आयोजित करे के प्रस्ताव म गोठबात खातिर सबो राज्य, केन्द्र शासित प्रदेश के शिक्षा मंत्रि, शिक्षा सचिव अउ राज्य परीक्षा बोर्ड के अध्यक्ष अउ हितधारक के संग एक उच्च स्तरीय वर्चुअल बइठक बुलाये गे हावय। बइठक के अध्यक्षता केंद्रीय रक्षा मंत्री राजनाथ सिंह करही। बइठक म केंद्रीय शिक्षा मंत्री रमेश पोखरियाल, केंद्रीय महिला अउ बाल विकास मंत्री श्रीमती स्मृति जुबिन ईरानी अउ केंद्रीय सूचना अउ प्रसारण मंत्री प्रकाश जावड़ेकर भी उपस्थिति रइही।

केंद्रीय शिक्षा मंत्री रमेश पोखरियाल ह राज्य, केंद्र शासित प्रदेश ल लिखे गे अपन एक चिट्ठी म किहिन के शिक्षा मंत्रालय के स्कूल शिक्षा अउ साक्षरता विभाग अउ सीबीएसई परीक्षा आयोजित करे के संबंध म छात्र अउ शिक्षक मनके सुरक्षा ल धियान म रखत विकल्प के तलाश करत हावयं। उच्च शिक्षा विभाग भी उच्चतर शिक्षण संस्थान मनके खातिर परीक्षा के तिथि ल आखरी रूप दे म विचार-विर्मश करे हावय।

पत्र म उल्लेख करिन हावय के कोविड-19 महामारी ह शिक्षा क्षेत्र, विशेष रूप ले बोर्ड परीक्षा अउ प्रवेश परीक्षा सहित आने-आने क्षेत्र ल प्रभावित करे हावय। मौजूदा स्थिति ल देखत, लगभग सबो राज्य शिक्षा बोर्ड, सीबीएसई अउ आईसीएसई ह अपन बारहवीं कक्षा के परीक्षा, 2021 के स्थगित करके दे हावय। अइसने राष्ट्रीय परीक्षण एजेंसी (एनटीए) अउ आन राष्ट्रीय परीक्षा आयोजित करे वाला संस्थान ह भी व्यावसायिक पाठ्यक्रम म प्रवेश के खातिर अपन प्रवेश परीक्षा ल स्थगित कर दे हावय।

चूंकि बारहवीं कक्षा के परीक्षा के आयोजन ले पूरा देश म राज्य बोर्ड परीक्षा अउ आन प्रवेश परीक्षा म प्रभाव पड़त हावय, संग ही ए संदर्भ म छात्र के बीच उपजे अनिश्चितता ल कम करे के खातिर ये जरूरी हावय के आने-आने राज्य सरकार अउ केंद्र शासित प्रदेश के प्रशासन के सुझाव के आधार म देश भर के सबो छात्र मनके हित म बारहवीं कक्षा के सीबीएसई परीक्षा के बारे म विचार करे जाए। श्री पोखरियाल ह ट्विटर के माध्यम ले सबो हितधारक- छात्र, अभिभावक, शिक्षक अउ आन लोगन ले भी सुझाव मांगें हावय।