फुरहुर मया के पुरवाही म बनिहार मनके पगरइती करत अनुज शर्मा के नवा एलबम ‘राजा-रानी’

सिनेमा। छत्तीसगढ़ी सिनेमा के बड़का कलाकार अनुज शर्मा के गजब दिन बाद एक नवा वीडियो एलबम ‘राजा रानी’ 20 मई के रिलीज होइस। ये वीडियो उंकर अपन यूट्यूब चैनल म अपलोड हवय जेमा गीत के संग आने गतिविधी उन साझा करे हावय। आरुग स्टूडियो के बैनर म सिरजे राजा रानी के ये गीत ल खूबसूरत अंदाज म गाये हावय अनुज शर्मा अउ ज्ञानिता द्विवेदी ह, शब्द रचना हावय सौरभ दीवान के।

फिल्मांकन के बात करत तव बहुत ही शानदार तरीका ले प्रस्तुत करे हावय। नायक के किरदार म स्वयं सुपरस्टार अनुज अउ नायिका के रूप म नवोदित अभिनेत्री इशिका यादव खूब जचत हावय। फुरहुर-फुरहुर मया के पुरवाही के बीच बनिहार मनके पगरइती करत नायक अउ नायिका मजदूरी करत हुए मया करत दिखत हावय। भई मया तो अइसे चीज ही होथे वो बेरा देखे न कुबेरा, परिस्थिति जइसन भी हो मया रंग म रंगा जाथे। 

अनुज अउ इशिका एक कंस्ट्रक्शीन साइट म मजदूरी करत हावय। ईटा अउ रेती के ढेरी म पसीना बोहावत मुच-मुच ले मुस्कावत गीत के भावाभिनय गजब सहज लगत हावय। एक तरह ले बनिहार मनके जीवन के खुशी ल कैमरे म कैद करे के कोशिश दिखत हावय। पसीना ले सनाये हाथ म गुलाब धरे मया के बखान करत नायक दूसरइया खेवन म राजा अउ रानी के सपना म समा जाथे। सकारात्मक सोच के साथ केहे जाए तो 4 मि‍नट के वीडियो एलबम म श्रमिक वर्ग के जीवन म आने वाला मया के कुछ पल ल रेखांकित करे के सुघ्घर उदीम करे गे हावय। वइसे अनुज शर्मा तो है ही लाजवाब, इशिका यादव के अदाकारी भी ओकर संग खूब जमे हावय। दर्शक मन तो ट्रेलर देखे के बाद ले ही पूरा वीडियो के अगोरा म रिहिस, अऊ खूब पसंद भी करत हावय। अनुज शर्मा यूट्यूब चैनल म अपलोड होते ये वीडियो ल ढेरों लाइक अउ कमेंट मिलत हावय। जेन रकम ले दर्शक मनके संख्या बाड़त हावय अइसे आकब हावय के एकेच दिन म एक करोड़ व्यूस पार कर जाही। 

मसखरी के बाद खरी बात-

वइसे अनुज के गायकी अउ अभिनय दुनों के अपन विशष्टता हावय, खूब रंग जमाथे। फेर काबर ते ये पइत राजा-रानी म खुलके नइ दिखे हावय, शायद वो ये गीत के माध्यम ले अपन प्रोडक्शन कंपनी अउ रिकॉडिंग स्टूडियो ल ज्यादा हाईलाइट करे के कोशिश म सुपरस्टार वाला छवि ल पाछु छोड़ आइस। संगीत हालांकि अलग तरह के हावय, कानफोड़ू नइ लागय अउ गायकी भी अच्छा हावय। लेकिन कहीं न कहीं अइसे लगत हावय के अनुज शर्मा म वो अनुज नइ दिखथे जेन हम बड़े सिनेमा म देखन।