राजीव गांधी किसान न्याय योजना के पहिली किश्त अउ गोधन न्याय योजना के रूपिया अइस खाता म

अंजोर.रायपुर, 21 मई 2021। मुख्यमंत्री श्री भूपेश बघेल ह आज पूर्व प्रधानमंत्री भारत रत्न श्री राजीव गांधी के पुण्यतिथि के मउका म अपन निवास कार्यालय म आयोजित कार्यक्रम म राजीव गांधी किसान न्याय योजना के तहत प्रदेश के 22 लाख किसान मन के खरीफ सीजन 2020-21 के पहिली किश्त के रूप म 1500 करोड़ रूपिया के कृषि आदान मदद रकम (इनपुट सब्सिडी) के अंतरण उंकर बैंक खाता म करिन।

कार्यक्रम म श्री बघेल ह येकर संग ही गोधन न्याय योजना के तहत राज्य के करीब 72 हजार पशुपालक ल 15 मार्च ले 15 मई तक गोबर खरीदी के एवज म 7 करोड़ 17 लाख रूपिया अउ गउठान समिति अउ महिला स्व-सहायता समूह के 3.6 करोड़ रूपिया के रकम ऑनलाइन अंतरित करिन। गोधन न्याय योजना के तहत पशुपालक अउ गांव वाला ल अब तक कुल 88 करोड़ 15 लाख रूपिया के भुगतान करे जा चुके हावय। मुख्यमंत्री ह कार्यक्रम म सांसद श्रीमती सोनिया गांधी के संदेश के वाचन करिन। राज्यसभा सांसद श्री पी.एल.पुनिया भी वीडियो कॉन्फ्रेंसिंग ले कार्यक्रम म शामिल होए रिहिन।

मिले आरो के मुताबिक ये मउका म विधानसभा अध्यक्ष डॉ. चरणदास महंत सहित स्वास्थ्य मंत्री टी.एस. सिंहदेव, गृह मंत्री ताम्रध्वज साहू, कृषि मंत्री रविन्द्र चौबे, वन मंत्री मोहम्मद अकबर, स्कूल शिक्षा मंत्री डॉ. प्रेमसाय सिंह टेकाम, नगरीय प्रशासन मंत्री डॉ. शिवकुमार डहरिया, खाद्य मंत्री अमरजीत भगत, महिला अउ बाल विकास मंत्री श्रीमती अनिला भेंड़िया, उद्योग मंत्री कवासी लखमा, राजस्व मंत्री जयसिंह अग्रवाल, उच्च शिक्षा मंत्री उमेश पटेल अउ लोक स्वास्थ्य यांत्रिकी मंत्री गुरू रूद्रकुमार उपस्थित रिहिस संग म कार्यक्रम म आने-आने जिला ले सांसद, विधायक, आन जनप्रतिनिधि, किसान अउ पशुपालक भी वीडियो कॉन्फ्रेंसिंग ले जुड़े रिहिस।