राष्ट्रीय आजिविका मिशन योजना के बीसी सखी मनके माध्यम ले घर-घर पहुंचत बैंक

अंजोर.बीजापुर, 23 मई 2021। कोरोना संक्रमण काल म जिहां एक तनि बैंक ले वित्तीय लेनदेन करे म केऊ समस्या, जइसे बैंक म लगने वाला लाइन ले संक्रमण फैले के डर अउ लॉकडॉउन लगे ले दुर्गम गवई क्षेत्र ले बैंक तक पहुंचे बर यातायात सुविधा के कमी उपजे हावय। ये चुनौती के बीच राष्ट्रीय आजिविका मिशन (एनआरएलएम) योजना ले जुड़े बैंक सखी मन जिला बीजापुर के गवई क्षेत्र म घर पहुंच बैंकिंग सुविधा उपलब्ध करात हावयं।

कलेक्टर रितेश अग्रवाल के मार्गदर्शन म अउ मुख्य कार्यपालन अधिकारी जिला पंचायत रवि कुमार साहू के निर्देशन म कोरोना काल म भी गांव वाला के पइसा के लेनदेन के समस्या नइ हो एला देखते स्व सहायता समूह के महिला मन ल बीसी  सखी के रूप म बुता करे बर प्रोत्साहित करे गे हावय। बीसी सखी मन डहर ले वृद्धा पेंशन, विधवा पेंशन, दिव्यांग पेंशन, मनरेगा मजदूरी भुगतान, गोधन न्याय योजना, राजीव किसान न्याय योजना आदि ले लाभान्वित हितग्राही मन के उंकर निवास जगह म रकम आहरण के सुविधा उपलब्ध होत हावय। 

अबतक 40 गांव पंचायत मन म बीसी सखी मन डहर ले बुता सुरू करे गे हावय। अगले एक सप्ताह म 15 अउ पंचायत मन म बीसी सखी डहर ले सुविधा प्रदान करे जाही। जिला प्रशासन डहर ले बीसी सखी मन ल चक्रीय निधि उपलब्ध कराके आरसेटी संस्था ले प्रशिक्षण देवाय गे हावय। जून  2020 ले अबतक बीसी सखी डहर ले 2 करोड़ ले जादा के लेनदेन करके हितग्राही मन ल लाभान्वित करे गे हावय। लघियात सबो इंटरनेट युक्त गांव म बीसी सखी के सुविधा उपलब्ध कराए जाये के योजना बनाये गे हावय। राशि लेनदेन के आधार म बीसी सखी ल 5 हजार रूपिया तक के मासिक आय अर्जित होथे। बीसी सखी कोविड प्रोटोकॉल के पालन करके अपन दायित्व के निर्वहन करत हावय। साथ ही लोगन के कोविड गाईड लाईन के पालन कराये जागरूक भी करत हावय मास्क के उपयोग सामाजिक दूरी, सरलग अंतराल म हाथ ल साबुन ले धोये सैनेटाईजर के उपयोग इत्यादि के खातिर प्रेरित भी करत हावय। इस सराहनीय बुता बर बीसी सखी मनले गवई के बुजुर्ग अउ दिव्यांगजन ल विशेष सुविधा मिलत हावय जेकर ले वो प्रशासन के ए सराहनीय बुता के खातिर आभार व्यक्त करत हावय।