रायपुर नगर निगम के ‘ऑक्सीजन ऑन व्हील्स’, एम्बुलेंस सेवा अउ राशन बांटे के शुभारंभ करिन दाऊ भूपेश बघेल

अंजोर.रायपुर,1मई 2021। मुख्यमंत्री भूपेश बघेल ह रायपुर नगर निगम के तीन जरूरी सेवा के ऑनलाइन शुभारंभ करिन। ओमन ‘ऑक्सीजन ऑन व्हील्स’ नाम ले होम आइसोलेशन के मरीज मन के खातिर ऑक्सीजन कन्सन्ट्रेटर के घर पहुंच सेवा, कोरोना मरीज मन के घर ले अस्पताल अउ अस्पताल ले घर लाने-ले जाये के खातिर फोकट म एम्बुलेंस सेवा अउ जरूरतमंद के खातिर फोकट म सूखा राशन वितरण बुता के शुभारंभ करिन। ये मउका महापौर एजाज ढेबर, मुख्य सचिव अमिताभ जैन, अपर मुख्य सचिव सुब्रत साहू अउ रायपुर नगर निगम के आयुक्त सौरभ कुमार भी वर्चुअल शुभारंभ कार्यक्रम म शामिल होइन।

मुख्यमंत्री श्री बघेल ह तीनों सेवा के शुरूआत करत किहिन के कोरोना काल अउ लॉक-डाउन म रायपुर नगर निगम लोगन ल सुविधा पहुंचाये के खातिर तत्परता अउ जिम्मेदारी ले काम करत हावन। कोरोना पीड़ित मनके इलाज के खातिर इंडोर स्टेडियम ल अस्पताल के रूप म तइयार करे गे हावय। मुख्यमंत्री ह किहिन के अइसे समय म जब केऊ राज्य म कोरोना के मरीज मन के खातिर ऑक्सीजन के मारामारी हावय, छत्तीसगढ़ म येकर घर पहुंच सुविधा शुरू करे जात हावय। ओमन लोगन ल मजदूर दिवस के बधाई अउ शुभकामना दीस। 

एजेंसी ले मिले आरो के मुताबिक कोरोना काल म लॉक-डाउन ले प्रभावित जरूरतमंद परिवार म वितरण के खातिर सात हजार पैकेट सूखा राशन गाड़ी म भरके रवाना करे गिस। स्थानीय पार्षद अउ जोन अधिकारी मन के संग समन्वय करके येला नगर निगम क्षेत्र के जरूरतमंद परिवार म फोकट म वितरित करे जाही। कोरोना काल के विषम परिस्थिति म मरीज मन के लघियात चिकित्सा सुलभ कराये रायपुर नगर निगम डहर ले सर्वसुविधायुक्त एंबुलेंस सुविधा उपलब्ध कराये जाही। होम आइसोलेशन म रहत अइसे मरीज जेकर ऑक्सीजन सेचुरेशन सामान्य ले कम हावय अउ ओला ऑक्सीजन कंसंट्रेटर ले मदद दे जाही, मरीज मन ल फोकट म घर पहुंच सेवा के जरिए ऑक्सीजन कंसंट्रेटर उपलब्ध कराये जाही।