आमनेर नदी म बनिस स्टॉप डेम, पेयजल अउ निस्तारी के संग आवागमन के मिलही सुविधा

अंजोर.राजनांदगांव, 21 मई 2021। जिला कलेक्टर ह खैरागढ़ विकासखंड के सुदूर वनांचल क्षेत्र के गांव सिवनी म आमनेर नदी म नवा बने स्टॉप डेम कम रपटा के निरीक्षण करिन। ओमन किहिन के स्टॉपडेम बने ले आसपास के गांव ल पानी के सुविधा के संग आवागमन के सुविधा मिलही। पेयजल के संग स्थानीय गांव वाला के निस्तारी के समस्या भी दूरिहा होही अउ गांव के जल स्तर भी बाढ़ही। गातापार जंगल क्षेत्र के निवासी अउ किसान मन के बैंक अउ बाजार सहित आन काम के खातिर पाड़ादाह ले होके मुढ़ीपार जाये के खातिर 30 किलोमीटर सफर करना पड़त रिहिस। स्टॉपडेम बने ले येकर दूरी अब केवल 10 किलोमीटर रह जाही। 

ओमन उहां उपस्थित गांव वाला ले बातचीत भी करिन। स्टॉपडेम के थोकिन दूरिहा म स्थित गांव चमुरदा के निवासी ईश्वर साहू ह बताइन के स्टॉपडेम के बने ले बहुत खुश हावयं। गर्मी म पानी सूख जाये ले बहुत ही समस्या होत रिहिस अउ जल स्तर भी कम हो जात रिहिस। उहें बरसात म अवइया-जवइया म कठिनाई के सामना करे ल परय, फेर स्टॉप डेम बने ले पानी के समस्या दूरिहागे हावय। आसपास जल स्तर बढ़े ले पेयजल के समस्या नइ होही। बरसात म भी आवागमन आसानी ले करे जा सकही अउ येकर ले आसपास के गांव ल लाभ मिलही।

जल आवर्धन अउ संरक्षण बुता एलडब्ल्यूई योजनांतर्गत 99 लाख 96 हजार रूपिया के लागत ले आमनेर नदी म स्टॉप डेम निर्माण करे गे हावय। येकर लम्बाई 42 मीटर अउ ऊंचाई 1.5 मीटर हावय। एमे 8 गेट लगे हावयं, जेकर ले लगभग 2500 घन मीटर पानी के स्टोरेज करे जा सकही। गांव सिवनी अउ गांव टिंगामाली के लगभग 56 एकड़ क्षेत्र म सिंचाई करे जा सकही। प्रधानपाठ बैराज के नीचे ए क्षेत्र म 550 मीटर जल भराव होही। येकर ले जंगल क्षेत्र के जानवर के खातिर पेयजल के संग स्थानीय गवई के निस्तारी के समस्या दूरिहा होही। ए मउका म एसडीएम खैरागढ़ श्रीमती निष्ठा पाण्डेय, कार्यपालन अभियंता जल संसाधन जीडी रामटेके, कार्यपालन अभियंता प्रधानमंत्री गांव सड़क योजना क्रमांक 1 ज्ञानेन्द्र कश्यप, तहसीलदार खैरागढ़ प्रीतम साहू, एसडीओ एनके रामटेके, सब इंजीनियर जेके जैन सहित आन अधिकारी उपस्थित रिहिस।