अंजोर.रायपुर, 22 मई 2021। मुख्यमंत्री भूपेश बघेल वीडियो कॉफ्रेंसिंग के जरिए गौरेला-पेंड्रा-मरवाही जिला म नवनिर्मित डेडीकेटेड कोविड अस्पताल अउ कोविड लैब के लोकार्पण करिन। मुख्यमंत्री ह जिला म नवा स्वास्थ्य सुविधा के खातिर सबो ल बधाई दीस। ओमन ए मउका म जिला म ऑक्सीजन प्लांट स्थापना के घोषणा भी करिन। लोकार्पण कार्यक्रम के अध्यक्षता स्वास्थ्य मंत्री टी.एस. सिंहदेव ह करिनस ए मउका म राजस्व मंत्री अउ जिला के प्रभारी मंत्री जयसिंह अग्रवाल, लोकसभा सांसद श्रीमती ज्योत्सना महंत, मरवाही विधायक डॉ के. के. ध्रुव वीडियो कॉन्फ्रेंसिंग के माध्यम ले अउ मुख्यमंत्री निवास ले वन मंत्री श्री मोहम्मद अकबर उपस्थित रिहिस।
मुख्यमंत्री ह किहिन के कोरोना के दूसरइया लहर अब पूरा छत्तीसगढ़ के संग गौरेला-पेण्ड्रा-मरवाही जिला म भी कम होत हावय। नवा मरीज भी अब कम आत हावयं। ये हम सबके खातिर राहत के बात हावय, फेर येकर मतलब ये नइ हावय के हम निश्चिंत हो जाएं। पहिली लहर के बाद जब कुछ महीना के खातिर कोरोना कम हो गे रिहिस, तब हम लोगन थोड़ा असावधान हो गे रेहेन। उही असावधानी के कीमत हमला के आज चुकाये ल पड़त हावय।
श्री बघेल ह किहिन के डेडीकेटेड अस्पताल म 150 आक्सीजन सिलेंडर के बेवस्था करे गे हावय। अस्पताल म 44 सामान्य आक्सीजन बेड, 6 एचडीयू बेड अउ 6 आईसीयू बेड होही। एमन ल मिले कर कुल 66 बिस्तर वाला ये अस्पताल होही। 6 बेड प्रेगनेंट, पोस्ट अउ प्री प्रेगनेंट कोविड मरीज महिला मन के उपचार के खातिर आरक्षित करे गे हावयं। ए अस्पताल के संचालन चौबीसों घंटा होही। 7 डॉक्टर अउ 6 नर्स के टीम इहां तैनात करे गे हावय।
ये मउका म स्वास्थ्य मंत्री टी.एस. सिंहदेव ह किहिन के ए अस्पताल के शुरु हो जाये ले अब गंभीर कोविड मरीज मन के उपचार इहां म हो सकही। गंभीर मरीज मनल दूसर जिला म रिफर नइ करना पड़े। कोरोना के दूसरइया लहर के खिलाफ लड़त लड़ाई ल ये नया अस्पताल मजबूती देही। राजस्व मंत्री अउ गौरेला-पेण्ड्रा-मरवाही जिला के प्रभारी मंत्री जयसिंह अग्रवाल ह नवा जिला म स्वास्थ्य सुविधा उपलब्ध कराये के खातिर मुख्यमंत्री अउ जिलावासी ल बधाई दीस। सांसद श्रीमती ज्योत्सना महंत ह कोरोना काल के विषम परिस्थिति म कोराना संक्रमण ले प्रभावित लोगन के इलाज के खातिर कोविड अस्पताल शुरू करे म मुख्यमंत्री के प्रति आभार प्रकट करिन। मरवाही विधायक डॉ. के.के. ध्रुव ह भी नवा जिला म स्वास्थ्य सुविधा के खातिर मुख्यमंत्री अउ जिलावासी मनला बधाई दीस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।