तहसीलदार स्व. श्रीमती करिश्मा दुबे वर्मा ल कलेक्टोरेट परिसर म अधिकारी-कर्मचारी मन दिस श्रद्धांजलि

अंजोर.गरियाबंद, 25 मई 2021। कलेक्टोरेट के भू-अभिलेख शाखा म पदस्थ तहसीलदार श्रीमती करिश्मा दुबे वर्मा के पाछु दिन आकस्मिक निधन होगे। आज गरियाबंद जिला कलेक्टोरेट परिसर म सबो विभाग के अधिकारी-कर्मचारी मन ह कलेक्टर निलेशकुमार क्षीरसागर के मौजूदगी म दू मिनट के मौन धारण करके मृत आत्मा के प्रति श्रद्धाजंलि अर्पित करिन।

सिरतोन म जबर दुख के घड़ी आए, युवा प्रशासनीक अधिकारी जेन मन अपन कर्मठता ले आम जनता के सेवा म लगे रिहिन ओमन के सेवा म आहुति होगे। समाज उंकर सेवा ल जरूर सुरता रखही। जानबा होवय के गरियाबंद जिला पंचायत सीईओ चंद्रकांत वर्मा जी के धर्मपत्नी रिहिस तहसीलदार श्रीमती करिश्मा दुबे वर्मा ह। ये आरो पाके प्रदेश के गृहमंत्री ताम्रध्वज साहू मन तको उनला श्रद्धांजलि देवत किहिन के ईश्वर दिवंगत आत्मा ल अपन श्री चरण म स्थान देवे अउ परिजन ल ये वियोग सहे के शक्ति प्रदान करें।

ए मउका म एडीएम जे.आर. चैरसिया, डिप्टी कलेक्टर श्रीमती ऋषा ठाकुर, एसीटी एल.आर. कुर्रे, उप संचालक जनसंपर्क एम.एस. सोरी, जिला शिक्षा अधिकारी भोपाल ताण्डेय, जिला शिक्षा समन्वय श्याम चन्द्राकर, सहायक संचालक रेशम एस.के. कोल्हेकर सहित कलेक्टोरेट के आन अधिकारी-कर्मचारी उपस्थित रिहिस।