माकड़ी कोविड केयर सेंटर म मानसिक अउ शारीरिक स्वास्थ्य खातिर योगाभ्यास

अंजोर.कोण्डागांव, 24 मई 2021। जिला म कोरोना के संक्रमण के रोकथाम अउ संक्रमित मनके ईलाज के खातिर सबो सुविधा वाला कोविड केयर सेंटर के निर्माण करे गे हावय। ये कोविड केयर सेंटर म कलेक्टर पुष्पेंद्र कुमार मीणा के आदेश म संक्रमित के इलाज के संग उंकर मानसिक अउ शारीरिक स्वास्थ्य म भी जोर दे जात हावय। ये खातिर रोज मरीज मन ल इंडोर गेम्स जइसे चैस, कैरम आदि के बेवस्था करे गे हावय। येकर अलावा मरीज मन के खातिर कॉमन हॉल म टीवी अउ बैठे के खातिर कुर्सी के इंतजाम करे गे हावय। काबर के कई अध्ययन म ये पाये गे हावय के कोरोना ना केवल शारीरिक बल्कि मानसिक स्वास्थ्य म भी प्रभाव डालत हावय जेला देखत जिला प्रशासन ह सबो कोविड केयर सेंटर म सरलग मनोरोग विशेषज्ञ के दौरा करके संक्रमित मरीज मन के मानसिक स्वास्थ्य के जांच करे के निर्देश दिये हावयं।

कोविड केयर सेंटर माकड़ी म कोरोना संक्रमित मरीज मन के मानसिक अउ शारीरिक स्वास्थ्य के खातिर योगाभ्यास अउ प्राणायाम सीएमएचओ टीआर कुँवर अउ आयुष नोडल अधिकारी के मार्गदर्शन म आयुर्वेद चिकित्सा अधिकारी डॉ आलोक जाधव कोविड केयर सेंटर के नोडल डॉ बीसीद धर, डॉ विनीत जगत अउ डॉ सतीश नायक डहर ले कराये जात हावय। जेमा रोज जनपद पंचायत सीईओ मुकुंद सलाम, तहसीलदार विजय मिश्रा डहर ले भी हिस्सा ले जात हावय। ये संबंध म आयुष नोडल डॉ चन्द्रभान वर्मा ह बताइन के योग अउ प्राणायाम ले शरीर म रोग प्रतिरोधक क्षमता बाढ़त हावय अउ ऑक्सीजन के कमी नइ होवे।