सोशल मीडिया म पोस्ट के बाद माईलोगन ल मदद पहुंचाइस जिला प्रशासन

अंजोर.कोण्डागांव, 06 मई 2021। सोशल मीडिया म हजारों लोगन मनोरंजन के साधन के रूप म प्रयोग करत हावयं, फेर ए डिजिटल जमाना म सोशल मीडिया कई बार लोगन के जीवन म परिवर्तन के साधन बनके उभरत हावय। अइसने एक महिला डहर ले ट्विटर म कोण्डागांव डिस्ट्रिक्ट एकाउंट के टैग करत लिखे रिहिस के कोण्डागांव विकासखंड के भगदेवा गांव म एक परित्यक्ता महिला घर म दू लइका के संग निवास करत हावय। उंकर पास खाये के खातिर राशन अउ कोनो भी आजीविका के साधन नइ हावय। लॉकडाउन म ओला मदद के जरूरत हावय। 

ट्विटर पोस्ट ल संज्ञान म लेवत कलेक्टर पुष्पेंद्र कुमार मीणा ह तुरते विकासखंड के अधिकारी मन ल मउका म जाके महिला के मदद बर निर्देशित करिन। जेकर तहत आज जनपद पंचायत सीईओ अमित भाटिया डहर ले भगदेवा गांव पहुंच महिला ले मुलाकात करे गिस। जमीनी स्तर म जांच म पाइन के महिला के संग ससुराल पक्ष के कहा सुनी के बाद महिला अकेल्लाइ रिथे अउ उंकर संग दू लइका जेमे ढाई साल के बेटी अउ डेढ़ साल के बेटा भी हावय।

येमा सीईओ डहर ले महिला ल 50 किलो चाउंर अउ एक हजार रुपिया के तुरते आर्थिक मदद दीस संग ही परिवार ले अलग उंकर खातिर राशन कारड निर्माण के प्रक्रिया चालू करके दीस। महिला ल मुख्यमंत्री सुखद सहारा पेंशन योजना ले भी जोड़े जात हावय। ए मदद के खातिर महिला डहर ले कलेक्टर अउ प्रशासन ल आभार व्यक्त करे गिस जेन उंकर ए कठिन समय म मदद के खातिर हाँथ आगू बढ़ाइस।