जिहां-जिहां भूपेश बघेल चुनाव प्रचार म जाथे कांग्रेस हारथे : डॉ. रमन सिंह

अंजोर.रायपुर। 2 मई के आये चुनई के नतीजा म सबले जादा खास रिहिस पश्चिम बंगाल, जिहां ले ममता बैनर्जी के पार्टी ह प्रदेश म तिसरइया पइत जीत हासिल करके सरकार बनाही। ममता दीदी के जीत ल सबो बड़का नेता मन सीधा प्रधानमंत्री ले जोड़ के देखत हावय काबर के भाजपा अपन पूरा ताकत लगा दे रिहिस उहां सरकार बनाये खातिर। फेर ममता दीदी के आगू नइ चलिस भाजपा के जादू।  

दूसर कोति असम चुनई ल देखत प्रदेश के पूर्व मुख्यमंत्री डॉ. रमनसिंह ह ट्वीट करके केहे हावय के ‘ मैं पहिली ही केहे रेहेवं के जिहां-जिहां भूपेश बघेल चुनाव प्रचार करे बर जाथे उहां कांग्रेस हार जथे। ओमन आगू किथे के बिहार, यूपी (अमेठी) के बाद असम म तको ये बात एक बार फेर साबित होगे। कांग्रेस के झूठा वादा अउ झूठा गारंटी ल जनता ह नकार दिस। एक बार फेर असम म भाजपा सरकार बनाये खातिर असम के जनता के धन्यवाद। ये पीएम श्री मोदी अउ सीएम के विकास के डबल इंजन के अवधारणा म जनता के मुहर आए।