आंध्र स्ट्रेन कोरोना : बस्तर अवइया बाहरी मनखे के होही कोरोना जांच

अंजोर.जगदलपुर 05 मई 2021। गजब घातक साबित होत कोरोना के आंध्र प्रदेश स्ट्रेन के बस्तर जिला म पहुंचे ल रोके के खातिर कड़ा निगरानी रखे के निर्देश कलेक्टर कोति ले दे गे हावय। कोविड टास्क फोर्स के बइठक म कलेक्टर ह किहिन के बस्तर म पहुंचइया सबोच मनखे के कोरोना जांच सुनिश्चित करे जाए, चाहे वो ह कोनो भी साधन ले पहुंचे। ओमन एयरपोर्ट, रेलवे स्टेशन के संग ही बस्तर जिला के सीमा म बनाये गे जांच चैकी म सबो यात्री के कोरोना जाँच के निर्देश दिस। 

ओमन किहिन के आंध्र प्रदेश ले आने वाले अधिकतर यात्री दरभा मार्ग ले बस्तर जिला के सीमा म प्रवेश करही। येकर संग ही धनपुंजी अउ मारडूम मार्ग ले आये के भी पूरा संभावना हावय, इही सेती ये रसता म भी पूरा सतर्कता रखे जाए अउ वाहन चालक सहित हर यात्री के कोरोना जांच करे जाए। ए बुता के खातिर जांच चैकी म उपराहा कर्मचारी मन के बेवस्था करे के निर्देश दीस अउ लापरवाही बरतने म कड़ा कार्यवाही के चेतावनी दीस।

कलेक्टर ह लॉक डाउन के बखत ग्रामीण क्षेत्र म लोगन ल रोजगार उपलब्ध कराये के खातिर मनरेगा के माध्यम ले जादा ले जादा बुता कराये के निर्देश दिस। ओमन जल संरक्षण अउ संवर्धन के संग ही सिंचाई अउ मछली पालन के माध्यम ले लोगन ल रोजगार उपलब्ध कराये के खातिर जादा ले जादा संख्या म तालाब के खनन म जोर देत ए बुता म लापरवाही बरतइया अधिकारी अउ कर्मचारी मन म नाराजगी व्यक्त करिस। बइठक म पुलिस अधीक्षक दीपक झा, सहायक कलेक्टर सुश्री सुरूचि सिंह, अतिरिक्त पुलिस अधीक्षक ओपी शर्मा, राजस्व विभाग, पुलिस विभाग, स्वास्थ्य विभाग, पंचायत अउ ग्रामीण विकास विभाग, नगरीय प्रशासन विभाग, शिक्षा विभाग, महिला अउ बाल विकास विभाग, समाज कल्याण विभाग पशुपालन विभाग सहित संबंधित विभाग के अधिकारी उपस्थित रिहिस।