अंजोर.धमतरी,16 मई 2021। छत्तीसगढ़ सरकार ह कोरोना ले बचाव के खातिर 18 ले 44 उमर के सबो वर्ग के लोगन के खातिर सुविधाजनक टीकाकरण के खातिर CGTEEKA वेबसाइट तइयार करे हावय, जेकर तहत नगर निगम आयुक्त मनीष मिश्रा ह निगम सभाकक्ष म सहायक राजस्व निरीक्षक, मितानिन, आंगनबाड़ी कार्यकर्ता के बइठक लेके अंत्योदय, बीपीएल परिवार के घर घर जाके रजिस्ट्रेशन कराये के खातिर निर्देशित करिन। आयुक्त ह बताइन के छत्तीसगढ़ सरकार के सीजी टीका वेब पोर्टल इहां के लोगन के सामाजिक अउ भौगोलिक परिस्थिति ल धियान म रखके तइयार करे गे हावय, ताकि लोगन ल टीकाकरण के खातिर कोनो भी रकम ले परेशानी न हो।
छत्तीसगढ़ सरकार के ए अभिनव पहल ले लोगन ल अब कोरोना के टीका लगवाये के खातिर न तो लम्बा लाइन लगाये ल पड़ही अउ न ही समय गवाये ल पड़ही। ओमन बताइन के सीजी टीका वेब पोर्टल म पंजीयन के खातिर लिंक http://cgteeka.cgstate.gov.in/user-registration म जानकारी अपलोड करना होही। पंजीयन के प्रक्रिया पूरा होए के बाद संबंधित मनखे ल टीकाकरण के ठऊर अउ समय के जानकारी एसएमएस के जरिए मिल जाही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।