रबी फसल बेचे खातिर छ: दिन 2 बजे तक खुलही धमतरी मण्डी... पढ़व पूरा नियम छत्तीसगढ़ी म

अंजोर.धमतरी, 22 मई 2021। कलेक्टर अउ जिला दण्डाधिकारी जयप्रकाश मौर्य ह लाकडाउन के बखत रबी फसल के उत्पाद के खरीदी, बिक्री, नीलामी संबंधी मंडी मनके संचालन के अनुमति शर्त के अधीन दे हावय। आदेश म बताये शर्त के मुताबिक जिला म मंडी के संचालन सप्ताह म छह दिन बिहनिया छह बजे ले मंझनिया दू बजे तक करे जा सकही अउ सबोच रविवार के मंडी बंद रखे जाही। ये शर्त जिला के उही मंडी म लागू होही, जिहां म गर्मी के दिन म परम्परागत ढंग ले खाद्यान्न के क्रय-विक्रय नीलामी के माध्यम ले करे जात हावय। 

मंडी परिसर ल रोज सेनिटाइज कराये अउ सोशल डिस्टेंसिंग के पालन कराये के पूरा जिम्मेदारी मंडी प्रभारी, मंडी सचिव की होही। कलेक्टर अउ जिला दण्डाधिकारी डहर ले जारी आदेश म केहे गे हावय के येकर अलावा रोज मंडी परिसर म उतना ही किसान अउ व्यापारी मनके प्रवेश के अनुमति दे जाही, जतका वो दिन क्रय-विक्रय करे जा सकही, ताकि मंडी परिसर म सोशल डिस्टेंसिंग के पालन करे जा सके। 

मिले आरो के मुताबिक मंडी परिसर म प्रवेश करइया मनखे मन के 96 घंटे पहिली के कोरोना नेगेटिव रिपोर्ट या वैक्सीन के दुनों डोज लगाये संबंधी प्रमाण पत्र दिखाना होही अउ मास्क अउ सैनिटाइजर के उपयोग करना अनिवार्य होही। ये छूट सब्जी मंडी म लागू नइ होही। ये आदेश 24 मई ले प्रभावशील होही।