अनुकंपा नियुक्ति म शिथिलता ले दुर्ग कलेक्ट्रेट म चार झिन ल मिलिस नौकरी

अंजोर.दुर्ग,31 मई 2021। अनुकंपा नियुक्ति के प्रकरण म दस प्रतिशत के सीमा शिथिल करे के मुख्यमंत्री भूपेश बघेल के फइसला ले युवा मन के खातिर सरकारी नौकरी के द्वार खुल गे हावयं। ये सीमा 31 मई तक शिथिल करे गे हावय। 10 प्रतिशत के सीमा के शिथिल होए ले कलेक्ट्रेट म चार अधिकारी-कर्मचारी मनके लइका के खातिर रोजगार के रद्दा खुल गे जेन ए सीमा के बाहिर रिहिस। आज कलेक्ट्रेट म ये युवा मन ल कलेक्टर डॉ. सर्वेश्वर नरेंद्र भुरे ह कलेक्ट्रेट कार्यालय के खातिर नियुक्ति चिट्ठी सौंपिन। 

आज चार युवा मन के नियुक्ति चिट्ठी मिलिस। एमे सौरभ भादुड़ी ल सहायक ग्रेड-3 के पद म नियुक्ति मिली। उंकर पिता सुमीत कुमार भादुड़ी पाटन तहसील कार्यालय म नायब तहसीलदार के रूप म कार्यरत रिहिस। सुमीत के बीते दिन मृत्यु हो गे रिहिस। सहायक ग्रेड -3 म सुश्री ऐश्वर्या राव ल नियुक्ति मिलीस। इंकर पिता ए शंकर राव धमधा म सहायक ग्रेड-3 पद म नियुक्ति रिहिस। येकर हार्ट अटैक ले मृत्यु होए रिहिस। इही पद म एस. अभिषेक के नियुक्ति भी होइस, वो कलेक्ट्रेट म वाहन चालक सुरेश कुमार के पुत्र हावयं कुमार के मृत्यु 27 फरवरी 2020 के होए रिहिस। चौथी नियुक्ति तेजेंद्र साहू के होइस येकर माता श्रीमती खेमिन साहू तहसील कार्यालय म रीडर रिहिसं। एमन ल भी सहायक ग्रेड-3 के पद म नियुक्त करे गे हावय। 

अभी दू प्रकरण म कार्रवाई जारी हावय जेला लघियात ही नियुक्ति मिल जाही। नियुक्ति चिट्ठी मिले के पाछु ये युवा मन ह बताइन के मुख्यमंत्री भूपेश बघेल के फइसला ले हमर परिवार ल बड़ राहत मिले हावय। सुश्री ऐश्वर्या ह बताइन के ए फइसला ले केऊ परिवार के लाभ पहुँचही जेकर अभिभावक शासकीय सेवा म रिहिस अउ जेकर असमय देहावसान हो गे। सुश्री ऐश्वर्या ह बताइन के कैबिनेट के फइसला के बाद ये उम्मीद रिहिस के जल्दीी ही अनुकंपा नियुक्ति मिल जाही फेर ये नियुक्ति एक हफ्ता के भीतर ही हो जाही, ये मालूम नइ रिहिस। तेजेंद्र साहू ह बताइन के मोर मम्मी तहसील आफिस म रिहिसं, कोविड के सेती ले वो नइ रहींस। माँ हम सबके संबल रिहिसं, अब मोला भी उंकर जिम्मेदारी ल अपन क्षमता ले निर्वाह करना हावय।