झीरम के बेगुनाह शहीद मनला न्याय जरूर मिलही: भूपेश बघेल

• दंतेवाड़ा अउ बस्तर विश्वविद्यालय म शहीद महेन्द्र कर्मा के प्रतिमा के होइस अनावरण
• शहीद महेन्द्र कर्मा के नाम म बस्तर विश्वविद्यालय अउ स्वर्गीय बलीराम कश्यप स्मृति चिकित्सा महाविद्यालय के हॉस्पिटल के विधिवत नामकरण

अंजोर.रायपुर, 25 मई 2021। मुख्यमंत्री निवास कार्यालय म ‘झीरम श्रद्धांजलि दिवस‘ के मउका म झीरम घाटी म 25 मई 2013 के होए नक्सल हमला म शहीद नेता अउ जवान मनला नमन करत विनम्र श्रद्धांजलि अर्पित करे गिस। जानबा होवय के झीरम घाटी के नक्सल हमला म छत्तीसगढ़ के वरिष्ठ नेता विद्याचरण शुक्ल, नंदकुमार पटेल, महेन्द्र कर्मा, उदय मुदलियार, योगेंद्र शर्मा सहित केऊ नेतागण अउ सुरक्षा बल के जवान शहीद हो गे रिहिस। श्री बघेल ह शहीद मनके चित्र म माल्यार्पण करके ओला पुष्पांजलि अर्पित करिन। शहीद मनके सुरता म दू मिनट के मौन रखके उनला श्रद्धांजलि दे गिस। ये मउका म मुख्यमंत्री भूपेश बघेल किहिन के झीरम के सबो बेगुनाह शहीद अउ घायल मनला  न्याय ज़रूर मिलही, जब तक ओला न्याय नइ मिलही, छत्तीसगढ़ सरकार चैन ले नइ बइठे। झीरम के शहीद मनला न्याय देवाये खातिर हम कृतसंकल्पित हावन अउ हम येकर लिये अपन लड़ाई जारी रखबो। चाहे एमे कतको बाधा आएं, छत्तीसगढ़ सरकार झीरम घाटी मामला के तह तक ज़रूर जाही। 

मुख्यमंत्री श्री बघेल ह दंतेवाड़ा अउ जगदलपुर म शहीद महेंद्र कर्मा के प्रतिमा के अनावरण के कार्यक्रम म अउ शहीद महेन्द्र कर्मा के नाम म बस्तर विश्वविद्यालय अउ जगदलपुर के डिमरापाल स्थित स्वर्गीय बलिराम कश्यप स्मृति चिकित्सा महाविद्यालय के अस्पताल के विधिवत नामकरण के कार्यक्रम म वीडियो कॉन्फ्रेंसिंग के माध्यम ले शामिल होइन। कार्यक्रम म दंतेवाड़ा ले उद्योग अउ वाणिज्य मंत्री कवासी लखमा, विधायक देवती कर्मा, जगदलपुर ले बस्तर सांसद दीपक बैज अउ विधायक रेखचंद्र जैन, वीडियो कॉन्फ्रेंसिंग के माध्यम ले राज्यसभा सांसद पी.एल. पुनिया अउ छत्तीसगढ़ मंत्रिमंडल के सदस्य, आने-आने जिला ले विधायक अउ जनप्रतिनिधि ए कार्यक्रम ले जुड़े रिहिन। मुख्यमंत्री निवास म विधायक मोहन मरकाम अउ बृहस्पति सिंह, मुख्यमंत्री के सलाहकार विनोद वर्मा अउ राजेश तिवारी, मुख्य सचिव अमिताभ जैन, अपर मुख्य सचिव सुब्रत साहू उपस्थित रिहिस।

मुख्यमंत्री ह आगू किहिन के 25 मई के झीरम घाटी के हिंसक घटना हम सबके दिल म एक फांस के रकम ले चुभत हावय। ये दिन छत्तीसगढ़, भारत अउ हमर लोकतंत्र के खातिर एक काला दिन हावय, जब नक्सली मन हमर पूरा के पूरा लीडरशीप ल खतम कर दे रिहिस। लोकतंत्र के महायज्ञ के तइयारी चलत रिहिस अउ उंकर पहिली ही पूर्णाहुति पड़ गे। हमर पथप्रदर्शक, हमर संगी अउ प्रदेश के सुनहरा भविष्य के दारोमदार जेन म रिहिस अइसे हमर नेता जनप्रतिनिधि, नागरिक अउ सुरक्षा कर्मी शहीद हो गे अउ केऊ लोगन घायल हो गये। आज येकर शहादत प्रदेश ल एक-एक मनखे के अवचेतन म श्रद्धापूर्वक याद आत होही।

कार्यक्रम म राज्यसभा सांसद पी.एल पुनिया ह किहिन के शहीद महेन्द्र कर्मा के सपना रिहिस के बस्तर नक्सल मुक्त हो अउ विकास के रस्ता म आगू बढ़े। ओमन येकर खातिर बहुत संघर्ष करिन। ये प्रसन्नता के बात हावय के मुख्यमंत्री भूपेश बघेल के नेतृत्व म छत्तीसगढ़ सरकार ए दिशा म बहुत अच्छा काम करत हावय। ओमन वनवासी मनके जंगल अधिकार मान्यता पत्र के वितरण, वनोपज खरीदी, मुख्यमंत्री सुपोषण अभियान अउ बस्तर अंचल म चिकित्सा अउ रोजगार के सुविधा उपलब्ध कराये के खातिर करे बुता के विशेष रूप ले उल्लेख करिन। वाणिज्य अउ उद्योग मंत्री कवासी लखमा अउ लोकसभा सांसद दीपक बैज ह दंतेवाड़ा अउ जगदलपुर म शहीद श्री महेंद्र कर्मा के प्रतिमा के अनावरण, शहीद महेन्द्र कर्मा के नाम म बस्तर विश्वविद्यालय अउ जगदलपुर के डिमरापाल स्थित स्वर्गीय बलिराम कश्यप स्मृति चिकित्सा महाविद्यालय के अस्पताल के विधिवत नामकरण के खातिर मुख्यमंत्री श्री भूपेश बघेल के प्रति आभार प्रकट करिन। 

विधायक मोहन मरकाम ह किहिन के शहीद महेन्द्र कर्मा बस्तर के जनता म काफी लोकप्रिय रिहिस। छत्तीसगढ़ सरकार स्वर्गीय कर्मा के बताए रास्ता म चलके अंचल के विकास के खातिर हर संभव प्रयास करत हावय। शहीद महेन्द्र कर्मा के धर्मपत्नी अउ विधायक श्रीमती देवकी कर्मा ह कार्यक्रम म झीरम घाटी के शहीद मनला नमन करिन। विधायक रेखचंद जैन ह किहिन बस्तर विश्वविद्यालय अउ मेडिकल कॉलेज के अस्पताल के नामकरण शहीद महेन्द्र कर्मा के नाम म करके राज्य सरकार ह उंकर स्मृति के चिरस्थायी बनाये हावय।