पार्षद वार्ड म हरेक आदमी के राशनकार्ड बनाके प्राथमिकता ले वितरण करय : वन मंत्री मोहम्मद अकबर

अंजोर.कवर्धा, 17 मई 2021। वन मंत्री मोहम्मद अकबर ह निवास कार्यालय ले वीडियो कॉन्फ्रेंसिंग के जरिए नगर पालिका परिषद कवर्धा के सबो पार्षद ले गोठबात करिन। ओमन ए बखत कोरोना ले बचाव अउ रोकथाम के उपाय म गोठबात करत पार्षद मनला अपन-अपन वार्ड म स्वच्छता सहित जनसुविधा के विस्तार के खातिर विशेष जोर दीस। संग ही ओमन वार्ड म हर मनखे के राशनकार्ड अउ पात्रतानुसार आवासीय पट्टा बनाके ओकर जल्दी ले जल्दी वितरण सुनिश्चित कराये के निर्देश दिस। ओमन किहिन के शासन के ये जरूरी योजना ले कोनो भी पात्र मनखे वंचित नी हो, येकर विशेष धियान रखें। ए मउका म कवर्धा नगर पालिका के अध्यक्ष ऋषि शर्मा अउ मुख्य नगर पालिका अधिकारी सहित सबो पार्षदगण उपस्थित रिहिस। 

वन मंत्री श्री अकबर ह सबो पार्षद मनला अपन-अपन वार्ड म कोरोना रोकथाम के उपाय म प्रभावी अमल सुनिश्चित करे के खातिर कहिन, संग ही वो उहां वार्ड म जरूरत के मुताबिक मरीज मन के तत्परता ले इलाज के खातिर हर संभव मदद पहुंचाये ल किहिन। येकर अलावा कोरोना संकट के ए दौर म जरूरत के मुताबिक अपन-अपन वार्ड म सूखा राशन अउ फोकट म दवा उक के वितरण के खातिर भी जरूरी पहल करें, जेकर ले जरूरतमंद लोगन के भोजन अउ दवई उक के खातिर कोनो असुविधा नी हो। वन मंत्री श्री अकबर ह कोरोना ले बचाव के खातिर अभी के बेरा म संचालित टीकाकरण अभियान म भी सबो पार्षद ल भरपूर सहयोग दे के खातिर किहिन। 

ओमन पार्षद मनके मांग म मरीज मन के बढि़या इलाज सुविधा के खातिर जिला चिकित्सालय कवर्धा म सीटी स्केन मशीन स्थापित करे अउ वेंटिलेटर के संख्या के अउ बढ़ाए जाये के संबंध म आश्वस्त भी करिन। येकर ले कवर्धा क्षेत्र के लोगन के इलाज के खातिर भटकना नइ परही अउ स्थानीय स्तर म ही इलाज के बने सुविधा उपलब्ध हो सकही। वन मंत्री श्री अकबर ह ए बखत गोठबात करत सबो पार्षद मनला वार्ड म जनसुविधा के विस्तार के खातिर विशेष जोर दीस। संग ही ओमन वार्ड के सरलग साफ-सफाई अउ स्वच्छता म भी सतत रूप ले निगरानी रखे के खातिर किहिन।