अपनेच विभाग म गड़बड़ी खातिर अधिकारी करिस अनशन, जांच के बाद दू पर्यवेक्षक निलंबित

अंजोर.महासमुन्द, 17 मई 2021। महिला अउ बाल विकास अधिकारी सुधाकर बोदले के अनशन खतम होगे हावय। बोदले ह संचालक महिला अउ बाल विकास श्रीमती दिव्या मिश्रा अउ कलेक्टर डोमन सिंह के आगू अनशन खतम करिस। श्रीमती मिश्रा ह कलेक्टर के कक्ष म ओला लस्सी पियाके अनशन खतम करिस। महिला अउ बाल विकास अधिकारी बोदले पाछू रविवार के अपन निवास म रेडी-टू-ईट वितरण योजना म अनियमितता अउ मुख्यमंत्री कन्या बिहाव योजना साल 2019-20 अउ 2020-21 टेण्डर प्रक्रिया के शिकायत ल लेके अनशन म बइठे रिहिस।

संचालक महिला अउ बाल विकास श्रीमती दिव्या मिश्रा ह कलेक्ट्रेट सभाकक्ष म पत्रकार मनले गोठबात करत किहिन के महिला अउ बाल विकास अधिकारी शिकायत बिन्दु के गठित जांच दल डहर ले आज सोमवार के महासमुन्द परियोजना ग्रामीण के जांच करे गिस। पहिली दृष्टया के रेडी-टू-ईट गुणवत्तापूर्ण नइ पाए जाये म प्रगति महिला स्व-सहायता समूह बरोण्डाबाजार अउ एकता महिला स्व-सहायता समूह लभराखुर्द ल बर्खास्त करे गिस अउ संबंधित सेक्टर के दू पर्यवेक्षक श्रीमती शशि जायसवाल बरोण्डाबाजार अउ श्रीमती दीपमाला तारक लभराखुर्द ल तुरते प्रभाव ले निलंबित करके दे गे हावय।

संचालक श्रीमती दिव्या मिश्रा ह किहिन के मुख्यमंत्री कन्या बिहाव योजनांतर्गत साल 2019-20 अउ 2020-21 के खरीदी म पहिली दृष्टया म अनियमितता परिलक्षित होत हावय। ये सेती साल 2019-20 अउ 2020-21 के संबंधित भुगतान म रोक लगा दे गे हावय। प्रकरण के जांच पूरा होए म दोषी मनके विरूद्ध नियमानुसार कार्यवाही करे जाही।