प. बंगाल म तिसरइया पइत मुख्यमंत्री के कुर्सी म सुश्री ममता बनर्जी, युवा नेता अखिलेश, हार्दिक अउ तेजस्वी दीस बधाई

अंजोर.रायपुर। पश्चिम बंगाल म एसो के चुनई ऊपर सरी देश के नजर रिहिस काबर के ममता बनाम मोदी के लहर चलत रिहिसे। प्रधानमंत्री स्वयं अपन पार्टी के झंठा ऊंचाये बंगाल म ‘दीदी ओ दीदी’ के नारा बुलंद करत रिहिस। फेर परिणाम तो जनता आखिर म तय करथे के मान ल मुखिया चुने। बंगाल म ममता बैनर्जी के पार्टी टीएमसी ह तिसरइया पइत सरकार म आए हाबे। शपथ लेके बाद देश भरके नेता मन उनला बधाई संदेश दे हावय।मिले आरो के मुताबिक देश के युवा नेता मन सबले जादा उनला सोशल मीडिया म ट्वीट करके बधाई पठोय हाबे।

उत्तरप्रदेश के पूर्व मुख्यमंत्री अखिलेश यादव ह लिखे हावय के ‘सुश्री ममता बनर्जी जी ल प. बंगाल के मुख्यमंत्री के रूप म लगातार तिसरइया पइत शपथ ले के हार्दिक बधाई अउ शुभकामना। प. बंगाल उंकर ऐतिहासिक जीत सहिक, ओकर ओजस्वी नेतृत्व म अमन-चैन अउ तरक़्क़ी के भी नवा मानक निर्मित करय इही कामना हावय।’ 

हार्दिक पटेल लिखथे के ‘प. बंगाल के जागरूक जनता ह आज ये देखा दिस के भारत के एकता ल नफरत, संप्रदायिकता अउ तुष्टिकरण ने नइ हराये जा सके। भाजपा डहर ले ममता दीदी उपर करे अपमानजनक कटाक्ष ‘दीदी ओ दीदी’ के जवाब जनता ह अपन वोट ले दिस। ममता दीदी अउ टीएमसी के कार्यकर्ता मनला हार्दिक बधाई।’ 

बिहार के युवा नेता तेजस्वी यादव लिखथे के ‘पश्चिम बंगाल के “ममतामयी” जनता ल कोटि कोटि बधाई अउ हार्दिक साधुवाद। आज जब पूरा देश कठिन परिस्थिति ले जूझत हावय। पश्चिम बंगाल ह एक बार फेर अपन ममता अउ भरोसा अपन दीदी म ही देखाये हावय। ये जनता के स्नेह अउ विश्वास के जीत आए। ममता दीदी के जी के दृढ़ अउ कुशल नेतृत्व के जीत आए।’