अंजोर.बलौदाबाजार, 24 मई 2021। जिला म लॉकडाउन के बाद कुछ राहत के संग बाजार खुले के बाद लोगन अइसे निकलत हावय, मानो कुछ होएच नइये। ये बीच नशा के कारोबार तको चलतेच हावय। सरकारी ठेका बंद होए के बाद लोगन मन हाथ भट्ठी के बने महुआ दारू पियत रिहिस। कोनो आन कोति के देशी अउ अंग्रेजी तको सपड़ म आ जात रिहिस। अऊ पुलिस तको अइसन मन बर सावचेत होके कार्यवाही करते हावय।
मिले आरो के मुताबिक आज थाना पलारी ल एक अऊ सफलता मिले हावय, ग्राम संडी म 120 पाव देशी मसाला शराब के साथ 02 आरोपी के गिरफ्तारी अउ मोटर सायकल के जप्ती करे गे हावय। पुलिस कोति ले आरोपी विजय रात्रे पिता किशन रात्रे उम्र 38 वर्ष साकिन भैंसा थाना खरोरा जिला रायपुर अउ टिकेन्द्र भारद्वाज पिता सुखचंद भारद्वाज उम्र 35 वर्ष साकिन पहंदा रोड वार्ड क्रमांक 10 बलौदाबाजार के विरूद्ध अपराध दर्ज करके आगू के कार्यवाही करे जात हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।