शहर म जरूरतमंद ल भोजन अउ गांव म बिहतरा घर म पुलिस के छापा, हमर रायगढ़ पुलिस के नवा रूप

अंजोर.रायगढ़। राज्य शासन के आदेश के मुताबिक महीना मई के पहिली सप्ताह ले अंत्योदय राशनकार्डधारी पात्र 18 ले जादा उमर के मनखे मन के पहिली टीकाकरण होत हावय। वैक्सीनेशन सेंटर म अव्यवस्था न हो येकर खातिर थानाक्षेत्र अन्तर्गत बनाये गे वैक्सीनेशन सेंटर म सुरक्षा बेवस्था बर थाना प्रभारीगण, स्टाफ के संग जाके लोगन के फिजिकल डिस्टेंसिंग के पालन करे अउ बेवस्था बनाये रखे म मेडिकल स्टाफ के सहयोग करत हावय। मिले आरो के मुताबिक ये बीच सरिया थानाक्षेत्र अन्तर्गत बनाये गे वैक्सीनेशन सेंटर म सरिया थाना स्टाफ डहर ले वैक्सीनेशन के बर आये मनखे मन ल बिस्किट अउ पानी बॉटल देके ओला प्रोत्साहित करत हावय। 

आज बिहनिया पुलिस चौकी जोबी क्षेत्र अन्तर्गत मास्क के प्रति प्रेरणा देती वृद्ध महिला के तस्वीर चौकी प्रभारी जोबी सहायक उप निरीक्षक प्रेमसाय भगत डहर ले पुलिस व्हाटसअप ग्रुप म शेयर करे गिस। चौकी प्रभारी बताइन के आज बिहनिया पेट्रोलिंग बखत खम्हार जंगल रोड़ किनारे एक वृद्ध महिला कोरोना संक्रमण ले बचाव के खातिर मास्क लगाये जमीन ले चार फल उठात रिहिस। वृद्ध महिला आरती बाई चौहान पति स्वर्गीय तिहारू राम उमर लगभग 65 साल निवासी खम्हार के रइया हावय। अकेला जीवन यापन करे के जानकारी मिले म चौकी प्रभारी ह वृद्ध महिला ल सूखा राशन प्रदाय करिस।  

येकरे संग लॉकडाउन म सरलग पुलिस जरूरतमंद के फूड पैकेट, ड्राई फूड के वितरण करत हावय। आज सुभाष चौक म कोतवाली थाना के सहायक उप निरीक्षक दिलीप बेहरा अउ पाइंट ड्यूटी के स्टाफ डहर ले असहाय, घूमंतू लोगन म ल खिचड़ी के वितरण करे गिस। शहर के संग ही अनुविभाग थानाक्षेत्र म पुलिस टीम सरलग बिहाव घर म जाके कोविड गाइडलाइन के पालन करे के समझाइश दीस हावय। इही क्रम म आज गांव राबो अउ गुड़गुड़ म पूंजीपथरा टीआई बिहाव घर जाके कोरोना दिशा निर्देश के पालन करे के समझाइस दिस।