अंजोर.रायपुर, 24 मई 2021। कोरोना संक्रमण ले पीड़ित अउ प्रभावित लोगन के मदद के सिलसिला जारी हावय। स्वयंसेवी, समाजसेवी संस्था, दानदाता अउ व्यावसायिक संगठन मन डहर ले राज्य म कोरोना संक्रमण के रोकथाम, पीड़ित मन अउ जरूरतमंद के मदद के खातिर शासन-प्रशासन ले जुड़के हरसंभव मदद दे जात हावय। इही म आज आईसीआईसीआई बैंक के पदाधिकारी मन ह कलेक्टर डॉ एस. भारतीदासन ले उंकर कार्यालय म मुलाकात करके 25 नग ऑक्सीजन कंसन्ट्रेटर प्रदान करिन।
कलेक्टर ह कोरोना संकट काल म मरीज मन अउ जरूरतमंद के मदद के खातिर बैंक डहर ले दे गे मदद के सराहना करिन। ओमन किहिन के कोरोना ले पीड़ित मनके जीवन रक्षा अउ मानवता के सेवा के समय हावय। अइसे समय म बैंक ह अपन सामाजिक जिम्मेदारी के बखूबी निर्वहन करे हावय।
आईसीआईसीआई बैंक डहर ले राज्य म कोरोना संक्रमण के रोकथाम के खातिर सीएसआर मद ले सरलग मदद पहुंचाए जाये के काम करे जात हावय। जेमा 25 नग ऑक्सीजन कन्सन्ट्रेटर रायपुर जिला के कोविड मरीज मन के मदद के खातिर विशेष तौर म बैंक डहर ले उपलब्ध कराये गे हावय। कलेक्टर ह आईसीआईसीआई बैंक के ए मदद के खातिर आभार ब्यक्त करिन हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।