ऑनलाइन दारू बेचे के बाद भी नइ रूकत अवैध बिक्री, थाना बागनदी अउ छुरिया पुलिस पकडि़स महाराष्ट्र के ठर्रा

अंजोर.राजनांदगांव,16 मई 2021। लॉकडाउन के सेती महीना भर ले दारू भट्ठी बंद हावय, फेर पियइया के झटपटी ल देखके अवैध कारोबार करइया मन आन-आन राज ले दारू लान के बेचत हावय। इही सेती छत्तीसगढ़ सरकार ह ऑनलाइन तरीका ले घर पहुंच दारू बेचे के उदीम शुरू करे हावय। तभो ले अवैध दारू बेचे के मामला म कोनो कमी होवत नइ दिखत हावय। 

पुलिस कोति ले मिले आरो के मुताबिक जिला राजनांदगांव के थाना छुरिया अउ बागनदी पुलिस ह आरोपी मन ले परोसी राज महाराष्ट्र के बने दारू ल पकड़े हावय। एक मामला म पुलिस ह आरोपी मनके कब्जा‍ ले 180 देशी दारू 7 स्टार कुल 122 नग कीमत 6344 रूपिया अउ परिवहन करत वाहन सहित जप्ती करे हावय। आरोपी रोहित कुमार सायतोण्डे अउ भागवत गंगे के खिलाफ धारा 34(2) आबकारी एक्ट के तहत गिरफ्तार करके जेल पठो दे हावय।

अइसने एक अऊ मामला म थाना बागनदी कोति ले आरोपी जीतू मानिकपुरी ग्राम उतई डबरी अउ ओकर साथी मन तिर ले 4 पेटी संत्री फिरकी महाराष्ट्र म बने दारू 9984 रूपिया कीमत के पकड़े हावय। आरोपी मन खेरबना मोड़ म पुलिस के नाकाबंदी करे म गाड़ी म सवार सबो आरोपी मन गाड़ी ल छोड़के जंगल कोति भगागे।