पउर-परिहार साल ले फदके ईनाम ल एसो ठउका झोकिन लइका मन, स्कूल शिक्षा मंत्री ह राष्ट्रीय शालेय क्रीड़ा प्रतियोगिता के 1547 खिलाड़ी मनला 2 करोड़ ले आगर के बांटिस पुरस्कार

अंजोर.रायपुर, 22 मई 2021। स्कूल शिक्षा मंत्री डॉ. प्रेमसाय सिंह टेकाम ह अपन निवास कार्यालय ले वर्चुअल कार्यक्रम म स्कूल गेम्स फेडरेशन ऑफ इंडिया के साल 2018-19 अउ साल 2019-20 के पदक विजेता 1547 खिलाड़ी मनला 2 करोड़ 38 लाख 38 हजार रूपिया के पुरस्कार रकम के वितरण करिन। स्कूल शिक्षा मंत्री डहर ले कार्यक्रम म राष्ट्रीय शालेय क्रीड़ा प्रतियोगिता म स्वर्ण, रजत अउ कांस्य पदक अर्जित करके राज्य ल गौरवान्वित करे खिलाड़ी मनला सम्मानित करिन। 

शिक्षा सत्र 2018-19 म 822 अउ सत्र 2019-20 म 725 खिलाड़ी ह राष्ट्रीय स्तर म पदक पाये हावय। राज्य शासन डहर ले राष्ट्रीय शालेय क्रीड़ा प्रतियोगिता म स्वर्ण पदक विजेता ल 21 हजार रूपए, रजत पदक विजेता ल 15 हजार रूपिया अउ कांस्य पदक विजेता मनला 10 हजार रूपिया के प्रोत्साहन रकम ले सम्मानित करिन। स्कूल शिक्षा मंत्री डॉ. प्रेमसाय सिंह टेकाम ह वर्चुअल कार्यक्रम म रायपुर जिला के दू खिलाड़ी कशिश सोनकर अउ विमल नन्देश्वर ल 21-21 हजार रूपिया के प्रोत्साहन रकम के डिमांड ड्राफ्ट प्रदान करके सम्मानित करिन।

ये मउका म ओमन किहिन के छत्तीसगढ़ राज्य के खातिर ये गौरव के बात हावय के साल 2018-19 म छत्तीसगढ़ प्रदेश ह देश म छठवां ठऊर अउ साल 2019-20 म आयोजित 65वीं राष्ट्रीय शालेय क्रीड़ा प्रतियोगिता म सातवां ठऊर मिले रिहिस। डॉ. टेकाम ह वर्चुअल कार्यक्रम के माध्यम ले सम्मानित होवइया सबो प्रतिभागी खिलाड़ी के उज्जवल भविष्य के कामना करिन। संग ही ओमन सबो व्यायाम शिक्षक मनला भी बधाई दीस, जेकर मार्गदर्शन म सबो खिलाड़ी ह ये अविश्वसनीय उपलब्धि मिले हावय। 

प्रतिभागी खिलाड़ी मन ह सत्र 2018-19 म राज्य म पहिली ठऊर रायपुर जोन, द्वितीय ठऊर राजनांदगांव जोन अउ तृतीय ठऊर दुर्ग जोन ह पाये रिहिस। इही सत्र म जिलावार पहिली ठऊर राजनांदगांव जिला, द्वितीय ठऊर रायपुर जिला अउ तृतीय ठऊर म दुर्ग जिला रिहिन। इही रकम ले शिक्षा सत्र 2019-20 म राज्य म पहिली ठऊर रायपुर जोन, द्वितीय ठऊर राजनांदगांव जोन अउ तृतीय ठऊर  कबीरधाम जोन ह पाये रिहिन हावय। इही सत्र म जिलावार पहिली ठऊर  राजनांदगांव जिला, द्वितीय ठऊर रायपुर जिला अउ तृतीय ठऊर बेमेतरा जिला ल मिले हावय।