कांकेर अउ कबीरधाम ले पुलिस के दू जवान लापता, पतासाजी करे बर गृह मंत्री दीस अधिकारी ल निर्देश

अंजोर.रायपुर, 4 मई 2021। प्रदेश के गृह मंत्री ताम्रध्वज साहू ह कांकेर अउ कबीरधाम जिला ले लापता दू पुलिस जवान मनके अभी तक कोनो सुराग नइ मिले के खबर ल गंभीरता ले ले हावय। ओमन पुलिस के वरिष्ठ अधिकारी मन ल दूरभाष म चर्चा करके लापता जवान मनके तुरते पतासाजी करे के निर्देश दे हावय। जानबा होवय के कांकेर जिला के कोड़ेकुर्से थाना म पदस्थ सहायक आरक्षक 28 अप्रैल के बिहनिया करीब 6 बजे थाने ले निकले रिहिस जेन अभी तक वापस नइ लहुंटे हावय। सीमा क्षेत्र के दू जिला के पुलिस जांच म जुटे हावय, फेर अभी तक कोनो सुराग नइ मिले हावय।

इही रकम कबीरधाम जिला म सीएएफ के 20 वीं बटालियन के सहायक उप निरीक्षक क्रिस्टोफर लकड़ा 21 अप्रैल ले लापता हावय। मध्य प्रदेश अउ छत्तीसगढ़ के सीमा म बनाए गे पुलिस कैंप ले श्री लकड़ा के गायब होए के आरो मिले हावय अउ रेंगाखर थाना म गुमशुदगी के रिपोर्ट दर्ज हावय। गृह मंत्री ह पुलिस विभाग के वरिष्ठ अधिकारी मन के जांच म तेजी लावत सबो जरूरी कार्रवाई तुरते सुनिश्चित करे के निर्देश दे हावयं।