गांव म प्राइवेट अस्पताल खोले बर राज्य सरकार देही अनुदान

अंजोर.रायपुर, 26 जून 2021। ग्रामीण क्षेत्र म स्वास्थ्य सुविधा ल अऊ मजबूती दे खातिर मुख्यमंत्री दाऊ भूपेश बघेल ह अब निजी क्षेत्र ले भी सहयोग लेके निर्देश दे हावयं। मुख्यमंत्री ह किहिन के ग्रामीण इलाका म विशेषज्ञ डॉक्टर मन के सेवा उपलब्ध हो सके, येकर खातिर सबो शासकीय अस्पताल मन म स्वास्थ्य सेवा के विस्तार के संग ही स्वास्थ्य अधोसंरचना के निर्माण म निजी क्षेत्र के सहयोग भी ले जाही। विशेषकर ग्रामीण क्षेत्र म अस्पताल निर्माण के खातिर निजी क्षेत्र ल राज्य सरकार डहर ले अनुदान भी दे जाही। ये अनुदान राज्य सरकार डहर ले सेवा क्षेत्र के उद्योग ल दे जात अनुदान के तहत होही। मुख्यमंत्री ह उद्योग विभाग के अवइया 10 दिन म येकर कार्ययोजना तइयार करे के निर्देश दे हावयं।

जानबा होवय के बीते ढ़ाई साल म राज्य सरकार डहर ले प्रदेश के ग्रामीण क्षेत्र म स्वास्थ्य सेवा के सुधार के खातिर केऊ बुता करे गे हावयं, फेर अभी भी छोटे जिला मुख्यालय अउ विकासखण्ड मुख्यालय म विशेषज्ञ डॉक्टर मन के उपलब्धता चुनौती बने हावय। मुख्यमंत्री श्री भूपेश बघेल ह कोरोना महामारी के बदलत स्वरूप ले निपटे खातिर अउ प्रदेशवासी मन ल बने स्वास्थ्य सेवा उपलब्ध कराये बर राजधानी ले लेके ग्रामीण इलाका तक स्वास्थ्य अधोसरंचना के विस्तार अउ उंकर सुदृढ़ीकरण के निर्देश दे हावयं।

मुख्यमंत्री ह किहिन के स्वास्थ्य अधोसंरचना के विस्तार के खातिर विशेषकर ग्रामीण इलाका म सबो शासकीय अस्पताल मन म सुविधा म बड़वार के संग ही निजी क्षेत्र के मदद ले जाना जरूरी हावय। ओमन किहिन के राज्य म उद्योग के स्थापना बर आने-आने रकम ले के अनुदान दिये जाते हावयं। ये अनुदान सेवा क्षेत्र के उद्योग के भी दे जात हावय। अभी के बेरा म स्वास्थ्य विभाग तनि ले निजी क्षेत्र के अस्पताल मन के स्थापना बर कोनो रकम के प्रोत्साहन दिये जाये के प्रावधान नइ हावय। इही सेती स्वास्थ्य अधोसंरचना के सुदृढ बनाये बर निजी क्षेत्र के ग्रामीण क्षेत्र म अस्पताल स्थापना बर प्रोत्साहित करे के खातिर अनुदान दे जाही। येकर खातिर उद्योग विभाग के 10 दिन म कार्ययोजना प्रस्तुत करे ल किहिन हावय।