दिल्ली म नवा छत्तीसगढ़ सदन निर्माण के निरीक्षण करिन गृह मंत्री साहू

अंजोर.रायपुर, 22 जून 2021। गृह अउ लोक निर्माण मंत्री ताम्रध्वज साहू ह आज नवा दिल्ली प्रवास के बखत द्वारका म बनत नवा छत्तीसगढ़ सदन के निर्माण बुता के निरीक्षण करिन अउ विभागीय अधिकारी मन ल जरूरी निर्देश दिस। गृहमंत्री श्री साहू ह निर्माण बुता के जायजा लेवत तय समय सीमा के अंदर बुता पूरा करे के निर्देश विभागीय अधिकारी मन ल दिस। ओमन लॉकडाउन के सेती रुके बुता ल जलदी ले पूरा करे के भी निर्देश दिस।

जानबा होवय के देश के राजधानी नवा दिल्ली के द्वारका म 60 करोड़ 42 लाख रूपिया के लागत ले नवा छत्तीसगढ़ सदन के निर्माण करे जात हावय। द्वारका के सेक्टर 13 म नवा छत्तीसगढ़ सदन के निर्माण के खातिर 43 हजार 803 वर्गफीट भूमि 22.50 करोड़ रूपिया म बिसाये गे हावय। नवा छत्तीसगढ़ सदन म 10 स्यूट रूम, 67 कमरे, डाइनिंग हॉल एंड वेटिंग सहित मीटिंग हॉल अउ कर्मचारी मन के खातिर टावर के निर्माण करे जात हावय। निरीक्षण के बखत गृहमंत्री ताम्रध्वज साहू के संग नवा दिल्ली के लोक निर्माण विभाग के अधिकारी आरपी यादव भी उपस्थित रिहिस।