Raigarh News : मल्टी स्पेशलिटी हॉस्पिटल म बदलही धरमजयगढ़ के सिविल अस्पताल

अंजोर.रायगढ़, 17 जून2021। जिला के दूरस्थ विकासखंड धरमजयगढ़ म स्वास्थ्य सुविधा के सुदृढ़ करे अउ विशेषज्ञ चिकित्सीय सेवा उपलब्ध कराये के लक्ष्य के संग इहां मुख्यालय स्थित सिविल अस्पताल ल मल्टी स्पेशलिटी हॉस्पिटल म अपग्रेड करे जात हावय। कलेक्टर ह आज जिला पंचायत सीईओ डॉ.रवि मित्तल, सीएमएचओ डॉ.एस.एन.केशरी, मेडिकल कॉलेज रायगढ़ के सर्जरी अउ एनीथीसिया विशेषज्ञ डॉक्टर मन के संग अस्पताल के निरीक्षण करके उन्नयन बर करे जाये वाला बुता अउ जरूरी संसाधन के बेवस्था के जायजा लिस। ओमन किहिन के मुख्यमंत्री भूपेश बघेल के निर्देश के मुताबिक दूरस्थ इलाका म स्वास्थ्य सुविधा के विस्तार करे जाना हावय। 

कलेक्टर श्री सिंह ह किहिन के धरमजयगढ़ के सिविल अस्पताल के अपग्रेड करे जाना हावय। इहां शिशु, स्त्री अउ अस्थि रोग ले जुड़े इलाज अउ सर्जरी के सुविधा इहां उपलब्ध होही। इंकर विशेषज्ञ डॉक्टर मन के पदस्थापना इहां करे जाही। जेकर ले अंचल के लोगन के इहें गंभीर रोग के इलाज मिल सके अउ ओला दूरिहा नी जाना पड़े। कलेक्टर ह उन्नयन संबंधी निर्माण बुता अउ उपकरण के खरीदी के प्रस्ताव अगले तीन दिन म तइयार करे के निर्देश सीएमएचओ ल दिस। जेकर ले तेजी ले काम आगू बढ़ाये जा सके।

कलेक्टर श्री सिंह ह अस्पताल के निरीक्षण के बखत सबले पहिली ओपीडी कक्ष के निरीक्षण करिन। इहां ओमन मरीज मन के लिये सर्व-सुविधायुक्त वेटिंग एरिया बनाये के निर्देश दिसे। ओमन येकर लिये परियोजना मद ले स्वीकृत करे गे 10 लाख रूपिया के रकम ले दू महीना म ये बुता पूरा करे के निर्देश दिसे। अस्पताल म डॉक्टर मन के बैठे के बेवस्था ल बढि़या करे अउ मरीज मन के जांच के खातिर डॉक्टर्स चेम्बर्स बनाये के निर्देश दिस। येकर बर ओमन अस्पताल के मेडीसीन काउंटर ल हटाके उहां म दू डॉक्टर चेम्बर्स बनाये ल किहिन।  

कलेक्टर श्री सिंह ह येकर पाछु आईपीडी कक्ष के निरीक्षण करिन। एला ओमन पूरा रूप ले रिनोवेट करे के निर्देश दिसे। जुन्ना सबो खिड़की, दरवाज ल बदलके नवा  लगाये के निर्देश दिसे। येकर बर ओमन सीएसआर मद ले अस्पताल के नवीनीकरण के खातिर दिये गे 50 लाख रूपिया के रकम के उपयोग करे ल किहिन।