अंजोर.अम्बिकापुर, 23 जून 2021। कोरोना महामारी ले बचाव के उपाय के खातिर देशव्यापी टीकाकरण अभियान 18 ले 44 साल अउ 44 साल ले जादा उमर वर्ग के मनखे मन खातिर चलाये जात हावय। टीकाकरण के खातिर स्वास्थ्य विभाग अउ जिला प्रशासन डहर ले सरलग प्रयास करे जात हावय। टीकाकरण ल लेके शहरी क्षेत्र के लोगन म उत्साह हावय उहें ग्रामीण क्षेत्र म केऊ भ्रांति के सेती लोगन म झिझक हावय। अइसे म जिला मुख्यालय अम्बिकापुर ले करीब 55 किलोमीटर दूरिहा वनांचल अउ जनजातीय बाहुल्य विकासखण्ड मैनपाट के विशेष पिछड़ी जनजाति मांझी-मझवार बाहुल्य गांव पथरई के टीकाकरण के खातिर पात्र लोगन ह तमाम भ्रांति ल दरकिनार करत कोविड के टीका लगवाइन अउ पूरा टीकाकरण गांव के संकल्प के सिद्ध करके देखाये हावय।
येकर संग ही अब सरगुजा जिला म शत-प्रतिशत टीकाकारण वाला 4 गांव हो गे हावयं। पथरई म 18 प्लस अउ 45 प्लस उमर के सबो 247 लोगन के टीकाकरण 22 जून के पूरा हो गे। लुण्ड्रा विकासखंड के गांव डहोली अउ पुरकेला अउ बतौली विकासखण्ड के गांव बतौली के 18 प्लस उमर के लोगन के शत-प्रतिशत टीकाकरण हो गे हावय। कलेक्टर श्री संजीव कुमार झा ह पूरा टीकाकरण के खातिर संकल्पित गांव वाले ल बधाई दीस हावय अउ टीकाकरण बुता म जुटे अधिकारी अउ कर्मचारी मन के अवइया 15 अगस्त के सम्मानित करे के बात कहे हावय।
जानबा होवय के कलेक्टर संजीव कुमार झा के मार्गदर्शन म जिला म कोविड-19 के टीकाकरण पाछु 16 जनवरी ले करे जात हावय। ग्रामीण क्षेत्र म सेक्टर प्रभारी अउ गांव प्रभारी सहित आंगनबाड़ी कार्यकर्ता अउ मितानिन सरलग टीकाकरण के खातिर मोबिलाइज करे रिहिन हावय। इही रकम ले नगर पालिक निगम म भी स्वास्थ्य विभाग अउ नगर निगम के टीम डहर ले वार्ड म कैम्प लगा के टीकाकरण के बुता करे जात हावय। जिला म टीकाकरण केन्द्र के संख्या बढ़ाये जात हावय। सबोच सेक्टर प्रभारी ल हर सप्ताह एक-एक गांव के शत-प्रतिशत टीकाकरण गांव बनाये के जिम्मेदारी दे गे हावय। जेकर परिपालन म सेक्टर अधिकारी अपन सेक्टर ले गांव ल पूरा टीकाकरण गांव बनाये म जुटे हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।