अंजोर.बलौदाबाजार, 28 जून 2021। आजकल टूरा-टूरी मनके मया के अलकरहा कहानी सुने बर मिलत हावय। सोशल मीडिया के कोनो फेसबूक, त कोनो टविटर त कोनो वाटसआप कोनो अऊ काहीं, लपरपटर गोठ ले मन मिलाके आनतान कर लेथे। फेर बाद होथे भारी पछतउल।
मिले आरो के मुताबिक बलौबाजार के थाना सिटी कोतवाली ह आज अइसने एक आरोपी भारत मनहरे ल पकड़े हावय जेन पाछू केऊ दिन ले फरार रिहिस। आरोपी भारत मनहरे के खिलाफ धारा 376, 376 (2)(N) भादवि के तहत है अपराध पंजीबद्ध हावय। पुलिस के बताती मामला टिकटाक प्रेम के हावय जेमा पुरानी बस्ती रायपुर के टूरी संग टिकटाक मोबाईल एप्स ले जान पहचान करके सोनपुरी बलौदाबाजार निवासी भारत मनहरे पिता हरियर मनहरे उम्र 23 वर्ष ह प्रार्थिया ल अपन प्यार के जाल म फंसा के शादी का प्रलोभन देके जबरदस्ती शारीरिक संबंध बना लिस। जेमा आरोपी के विरूद्ध अपराध पंजीबद्ध कर विवेचना म लिये गिस।
घटनास्थल बलौदा बाजार कोतवाली क्षेत्र के होये ल बलौदाबाजार पुलिस ह फरार आरोपी के लगातार पता करते रिहिस। तभे सिटी कोतवाली पुलिस ल आरो मिलिस के फरार आरोपी भारत मनहरे रायपुर उरला म लुकाये हावय। सूचना म टीम भेज के आरोपी ल हिरासत म लेके पुछताछ करे म वो अपन जुर्म स्वीकार कर लिस। जिला म महिला संबंधी अपराध म अंकुश लगाये अउ लघियात कार्यवाही करत बड़का अधिकारी मनके मार्गदर्शन म थाना प्रभारी के नेतृत्व म थाना सिटी कोतवाली बलौदाबाजार के अपराध क्र 247/2021 धारा 376, 376 (2)(N) भादवि के आरोपी ल रिमाण्ड पेश करके जेल भेज दीस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।