रोजगार गारंटी योजना ले बैगा आदिवासी तक पहुंचिस विकास के रास्ता, पथरीला पगडंड़ी ल बनाइस चिकना सड़क

अंजोर.रायपुर, 17 जून 2021। विकास के मूलभूत सुविधा के खातिर सबले जरूरी शर्त हावय सतत आवागमन के सुविधा। मैदानी क्षेत्र म त सुविधा आसानी ले उपलब्ध होत हावय फेर जंगल क्षेत्र म निवास करइया लोगन आवागमन खातिर जंगल के सहारा लेवत पथरीले अउ टेढ़े-मेढ़े गड्ढो के संग जोखिम ले भरे पहाड़ के बीच ले आना-जाना उंकर बर बहुत कष्टप्रद होथे। पहाड़ी क्षेत्र म बैगा बहुल गांव भेलकी अउ अधचरा के निवासी मन के खातिर भी पहाड़ के बीच ले घाट कटिंग करके सड़क बनाये के मांग जरूरी रिहिस, जेला महात्मा गांधी राष्ट्रीय ग्रामीण रोजगार गारंटी योजना ह पूरा करे हावय। घाट कटिंग हो जाये ले पहाड़ के बीच बैगा आदिवासी मनके आवागमन के सुविधा मिलत हावय संग म आसपास के लगभग 400 ले जादा के आबादी ल सोज लाभ होवथाबे। 

कबीरधाम जिला के सुदूर वनांचल गांव भेलकी अउ अधचरा जेन विकासखंड पंडरिया के वनांचल गांव हावय, इहां विशेष पिछड़ी जनजाति बैगा आदिवासी निवासरत हावय। वैश्विक महामारी कोरोना के लॉकडाउन म घाट कटिंग बुता के संग भेलकी अउ अधचरा के गांव वाला ल रोजगार के मउका मिलिस संग म साकार होइस बरसों के जुन्ना सपना। वित्तीय साल 2020-21 म इहां बुता 18 लाख 17 हजार रूपिया के लागत ले स्वीकृत होइस। ए बुता म दू गांव के 140 परिवार के बड़ मात्रा म रोजगार के मउका मिलिस। लॉकडाउन के बखत सब कुछ बंद रिहिस अउ गांव के बाहिर काम के कोनो साधन नइ रिहिस। ए विकट परिस्थिति म गांव वाला के खातिर रोजगार गारंटी योजना ले घाट कटिंग के बुता सहारा बनके उभरिस। संग ही एमन ल आने जाये के खातिर पथरीले रद्दा के जगह सुगम सड़क मिलगे। 

18 लाख 17 हजार रूपिया ले बने ए घाट कटिंग अउ सड़क निर्माण बुता के लंबाई 2 किलोमीटर हावय जेन गांव पंचायत भेलकी म स्वीकृत होइस हावय। अप्रैल महीना ले प्राम्भ होए ए बुता म अब तक औसतन 180 पंजीकृत मजदूर रोज काम करे हावयं, जेमे 5952 के मानव दिन रोजगार के सृजन करे जा चुके हावय। ए बुता ले गांव वाला के 10 लाख 19 हजार रूपिया के मजदूरी भुगतान मिले हावय जेन ओला सोज तौर म आर्थिक संबल देही। 11 सप्ताह तक चले ये बुता अब लगभग पूरा होए के स्थिति म हावय।