मानव संग्रहालय, भारत भवन, अभिलेखागार, फिल्म सिटी अउ सांस्कृतिक गांव के निर्माण लघियात : मंत्री अमरजीत भगत

अंजोर.रायपुर, 17 जून  2021। संस्कृति, योजना, आर्थिक अउ सांख्यिकी मंत्री अमरजीत भगत ह मंत्रालय (महानदी भवन) म विभागीय काम-काज के समीक्षा करिन। मंत्री श्री भगत ह संस्कृति विभाग के समीक्षा के बखत किहिन के प्रदेश के कला संस्कृति, ऐतिहासिक अउ पुरातत्विक धरोहर जतका समृद्ध होही उतना ही ओकर महत्व बढ़ही। ओमन किहिन के राज्य के संरक्षित ऐतिहासिक अउ पुरातत्विक धरोहर के संरक्षण सुनिश्चित करे जाए। जीर्ण-शीर्ण स्थिति म पड़े धरोहर के जीर्णोद्धार हो। छत्तीसगढ़ ऐतिहासिक अउ पुरातत्विक दृष्टिकोण ले समृद्ध राज्य हावय। प्रदेश के आन ठऊर मन के चिन्हांकित करके पुरातत्विक खनन अउ सर्वे के काम होना चाही। 

मंत्री श्री भगत ह छत्तीसगढ़ ले जुड़े अंग्रेजी शासनकाल के आदेश, निर्णय सहित राजा महाराजा अउ बौद्धिक अउ अध्यात्मिक दृष्टिकोण ले जुड़े अभिलेख ल म्यूजियम म संरक्षित रखे के संग-साथ विभागीय वेबपोर्टल म अपलोड करे के निर्देश दिस। ओमन किहिन के पर्यटक के सुविधा के खातिर पुरातत्विक अउ ऐतिहासिक धरोहर जगह म आवागमन बर सड़क, पानी, बिजली सहित आन सुविधा के विस्तार करे जाए। मंत्री श्री भगत ह बइठक म किहिन के मुख्यमंत्री भूपेश बघेल के मंशानुरूप नवा रायपुर म मानव संग्रहालय, भारत भवन, अभिलेखागार, फिल्म सिटी अउ सांस्कृतिक गांव उक के स्थापना के खातिर लघियात कार्ययोजना तइयार करके वोमा अमल करे जाए। राज्य स्तर म सांस्कृतिक गांव के स्थापना के संग क्षेत्रीय स्तर म भी जगह चिन्हांकित करके सांस्कृतिक गांव के स्थापना करे जाना चाही। 

मंत्री श्री भगत ह छत्तीसगढ़ के कला अउ संस्कृति के समावेश ले बने विशेष रकम ले के वेलकम गमछा के अवलोकन करिन। गमछा के स्वरूप फाइनल होए के बाद मुख्यमंत्री डहर ले लोकार्पण करे जाही। ये एक राजकीय गमछा होही। ए गमछा ले कलाकार, अतिथि, बुद्धजीवी अउ उत्कृष्ट बुता करे वाला लोगन सहित सभा समारोह म अतिथि अउ लोगन के स्वागत करे जाही। मंत्री श्री भगत ह प्रदेश के सबो 27 जिला म गढ़कलेवा शुरू करे के स्थिति के भी जानकारी लिस। अधिकारी मन ह बताइन के 10 जिला म अस्थाई रूप ले गढ़कलेवा शुरू करके दे गे हावय। ये गढ़कलेवा केन्द्र के स्थायी करे के कार्यवाही करे जात हावय। बांचे जिला म भी जल्दीन गढ़कलेवा के शुरूआत करे जाही। अधिकारी मन ह बताइन के छत्तीसगढ़ ले जुड़े अभिलेख ल एकत्र करके डिजीटलाइजेशन के बुता करे जात हावय। 

अभी के बेरा म दू ले ढाई लाख अभिलेख के डिजीटलाइजेशन करे के लक्ष्य रखे गे हावय। एक लाख अभिलेख के खातिर आर्डर दे गे हावय। डिजीटलाइजेशन ले शोध छात्र, रिसर्चर, पाठक के अध्ययन म मदद मिलही। अधिकारी मन ह बताइन के छत्तीसगढ़ फिल्म पॉलिसी के नीति बनाये के खातिर रूपरेखा तइयार कर ले गे हावय। मंत्रीपरिषद म मंजूरी के बाद एला लघियात अमल म लाये जाही। अधिकारी मन ह बताइन के मानव संग्रहालय, भारत भवन, अभिलेखाकार अउ सांस्कृतिक गांव के खातिर जगह चिन्हांकित करके कार्ययोजना तइयार कर ले गे हावय। जल्दीग ही एनआरडीए के अधिकारी मन ले समन्वय करके बुता सुरू करे जाही।