मुख्यमंत्री ह कोरिया अउ सूरजपुर जिला ल दीस 460 करोड़ रूपिया के सौगात

अंजोर.रायपुर, 16 जून 2021। मुख्यमंत्री भूपेश बघेल ह किहिन हावय के विकास के सही मतलब लोगन के जीवन म सुख, शांति अउ समृद्धि लाना हावय। प्रदेश सरकार डहर ले आमजनता के जीवन म खुशहाली लाने के खातिर सुराजी गांव योजना नरवा, गरूवा, घुरूवा, बाड़ी कार्यक्रम, राजीव गांधी किसान न्याय योजना, गोधन न्याय योजना, वनोपज संग्रहण अउ प्रसंस्करण के जरिए गवई अंचल म छोटे-छोटे उद्यम अउ स्वरोजगार के शुरूआत करे गिस। येकर ले पूरा राज्य म स्वावलंबन के नया वातावरण दिखत हावय। गांव म उद्यम ले रोजगार के नवा रद्दा खुले हावयं।

मुख्यमंत्री श्री बघेल अपन रायपुर निवास कार्यालय म आयोजित वर्चुअल कार्यक्रम म सूरजपुर अउ कोरिया जिला ल 460 करोड़ 14 लाख रूपिया के लागत के विकास बुता के लोकार्पण अउ भूमिपूजन समारोह ल सम्बोधित करत रिहिस। ओमन ए मउका म कोरिया अउ सूरजपुर जिला म जनसुविधा के विकास के खातिर 368 निर्माण बुता के लोकार्पण अउ भूमिपूजन करिन, जेमे 184 करोड़ 28 लाख 75 हजार रूपिया के लागत वाला 187 बुता के लोकार्पण अउ 275 करोड़ 85 लाख 39 हजार रूपिया के लागत वाला 180 बुता के भूमिपूजन शामिल हावय। मुख्यमंत्री  भूपेश बघेल ह कार्यक्रम के बखत स्वामी आत्मानंद अंग्रेजी माध्यम स्कूल के बच्चा, गोधन न्याय योजना, राजीव गांधी किसान न्याय योजना सहित आने-आने योजना मन ले लाभान्वित किसान मन अउ महिला स्व-सहायता समूह के सदस्य मन ले गोठबात करिन अउ दुनों जिला के लोगन ल बधाई अउ शुभकामना दीस। 

श्री बघेल ह स्कूल शिक्षा मंत्री डॉ. प्रेमसाय सिंह टेकाम के गेलौली म सरहरी- सिंघरा-चरमपुर मार्ग के बांकी नदी म पुल निर्माण कराए जाये अउ संसदीय सचिव पारसनाथ राजवाड़े के मांग म सूरजपुर जिला के ओडगी अउ लटोरी म सहकारी बैंक के शाखा खोले जाये के घोषणा करिन। ए मउका म मुख्यमंत्री ह संसदीय सचिव मती अंबिका सिंहदेव अउ विधायक डॉ. विनय जायसवाल के गेलौली म कोरिया म जिला अस्पताल भवन अउ चिरमिरी म एडवेंचर पार्क के निर्माण बुता के अतिशीघ्र शुरू करे के निर्देश कलेक्टर ल दिस। सूरजपुर जिला म तेलाईकछार-केनापारा म विकसित पर्यटन जगह के प्राकृतिक सौंदर्य के मुख्यमंत्री ह सराहना करिस अउ इहां पर्यटक मकेन सुविधा अउ विश्राम के खातिर हाट अउ विश्राम भवन के निर्माण कराए जाये के भी निर्देश कलेक्टर ल दिस।

ए मउका म मुख्यमंत्री निवास कार्यालय म गृह मंत्री ताम्रध्वज साहू, कृषि मंत्री  रविंद्र चौबे, नगरीय प्रशासन मंत्री डॉ. शिव कुमार डहरिया, शिक्षा मंत्री डॉ. प्रेमसाय सिंह टेकाम, संसदीय सचिव पारसनाथ राजवाड़े, सरगुजा विकास प्राधिकरण के उपाध्यक्ष अउ विधायक गुलाब कमरो, विधायक डॉ. विनय जायसवाल, अपर मुख्य सचिव सुब्रत साहू उपस्थित रिहिस। कार्यक्रम म विधानसभा अध्यक्ष डॉ चरणदास महंत, कोरबा सांसद श्रीमती ज्योत्सना महंत, उच्च शिक्षा मंत्री उमेश पटेल, संसदीय सचिव श्रीमती अंबिका सिंहदेव, विधायकगण अउ आन जनप्रतिनिधि वर्चुअल रूप ले कार्यक्रम म शामिल होइन।