अंजोर.रायपुर, 27 जून 2021। मुख्यमंत्री भूपेश बघेल ह प्रदेश के किसान मन ले अपील करे हावय के वो छत्तीसगढ़ के परंपरा के मुताबिक एक जुलाई ले अपन-अपन गांव म रोका-छेका अभियान शुरू करें। संग ही ओमन किहिन के पशुपालक अपन पशु मन ल खुला म चराई के खातिर छोड़ं के बजाय ओला गउठान म भेजें, जिहां चारा-पानी के प्रबंध करे गे हावय।
मुख्यमंत्री श्री बघेल ह किसान मन अउ पशुपालक के नाम अपन संदेश म किहिन हावय के बरसात के दिन म पशु मन म गलघोटू अउ एकटंगिया बीमारी होथे। येकर ले बचाव के खातिर अपन पशु मन ल टीका जरूर लगवाएं। श्री बघेल ह किहिन हावय के ईश्वर के कृपा ले ए बार हमर राज्य म मानसून सही समय म आ गे हावयं। राज्य म अब तक पर्याप्त बरसात हो चुके हावय। किसान भाई अपन खेत म फसल के तइयारी म लग गे हावयं। राज्य के जलाशय अउ तालाब म भी भरपूर पानी उपलब्ध हावय। किसान भाई के खाद-बीज उंकर जरूरत के मुताबिक सहकारी समिति मन ले मिल सके ए म हम विशेष धियान देत हावन। सबो सोसायटी म रासायनिक उर्वरक अउ प्रमाणित बीजहा के भण्डारण सरलग करे जात हावय।
हम राज्य म ए बार दलहनी अउ तिलहनी फसल मन म जादा जोर दे हावन। ये फसल मन के उत्पादन बढ़ाये ले किसान भाई ल जादा लाभ मिलही। हमन दलहन-तिलहन, अरहर, सोयाबीन, मक्का, गन्ना, कोदा-कुटकी, सुगंधित धान के खेती ल प्रोत्साहित करे के खातिर एला राजीव गांधी किसान न्याय योजना म शामिल करके हावन। धान के संग-साथ आन प्रमुख खरीफ फसल मन के खेती करइया किसान भाई ल भी प्रति एकड़ के मान ले 9 हजार रूपिया के आदान मदद करबोन।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।