अनुकंपा नियुक्ति म मुख्यमंत्री के फइसला ले लाभ : शिक्षा विभाग म 42 युवा ल मिलिस सरकारी नौकरी

अंजोर.बिलासपुर, 02 जून 2021। अनुकंपा नियुक्ति के प्रकरण म 10 प्रतिशत के सीमा शिथिल करे के मुख्यमंत्री भूपेश बघेल के फइसला ले युवा मन के खातिर सरकारी नौकरी के द्वार खुल गे हावय। ये सीमा 31 मई 2022 तक के खातिर शिथिल करे गिस हावय। 10 प्रतिशत के सीमा के शिथिल होए ले शिक्षा विभाग म 42 कर्मचारी मन के लइका के खातिर रोजगार के रद्दा खुलगे।

आज मंथन सभाकक्ष म कलेक्टर डॉ. सारांश मित्तर ह प्रतीकात्मक रूप ले शिक्षा विभाग के खातिर नियुक्ति चिट्ठी 6 युवा मनल सौंपिस। कलेक्टर ह युवा मनला प्रेरित करत किहिन के आप मन पूरा निष्ठा के संग सौंपे गे दायित्व के निर्वहन करहू। ओमन प्रभारी जिला शिक्षा अधिकारी श्री पी. दासरथी डहर ले तत्परता दिखात ये प्रकरण के निराकरण बर उंकर सराहना करिन। ओमन किहिन के अनुकंपा नियुक्ति शासकीय सेवक ल सेवा बुता के बखत असामयिक निधन बाद आश्रित के अधिकार हावय। जेन 42 लोगन ल अनुकंपा नियुक्ति दे गे हावय ओमा 39 सहायक ग्रेड-03 अउ 03 पद भृत्य के शामिल हावय। एमे 15 युवा अइसे हावय जेकर परिजन मनके असामयिक मृत्यु कोविड के सेती होए रिहिस।

नियुक्ति चिट्ठी मिले के पाछु युवा मन ह बताइन के मुख्यमंत्री भूपेश बघेल के फइसला ले हमर परिवार ल बड़ राहत मिले हावय। गांव सैदा निवासी सुश्री विनिता मिश्रा ह बताइन के ओला शासकीय स्कूल तारबहार म सहायक ग्रेड-03 के पद म नौकरी मिले हावय। वो कहत हावय के ए फइसला ले केऊ परिवार ल लाभ पहुंचे हावय जेकर अभिभावक शासकीय सेवा म रिहिस अउ जेकर असमय देहावसान हो गे। सुश्री स्वीटी जायसवाल ह बताइन के उंकर पिता के असामयिक निधन ले उंकर पूरा परिवार बिखर गे। मुख्यमंत्री डहर ले गे फइसला ले आज ओला नौकरी मिल पाई हावय। येकर ले उंकर परिवार के संबल मिलही। प्राजंल सिंह राठौर ह बताइन के कैबिनेट के फइसला के बाद उम्मीद रिहिस के जल्दीफ ही अनुकंपा नियुक्ति मिल जाही फेर फइसला के बाद इतना जल्दी मिल जाही ये मालूम नइ रिहिस। आशुतोष रजक ह बताइन के ओला उंकर पिता के ठऊर म नौकरी मिले हावय। वो कहत हावय के मुख्यमंत्री भूपेश बघेल डहर ले लेगे ये फइसला उंकर जइसे सबो परिवार ल हौसला देवइया हावय।