पंडित माधवराव सप्रे जयंती समारोह के वर्चुअल उद्घाटन करही मुख्यमंत्री, डॉ. कुसुम खेमानी ल दे जाही साहित्यिक पत्रकारिता सम्मान

अंजोर.रायपुर, 18 जून 2021। पंडित माधवराव सप्रे के 150 वीं जयंती के मउका म संझा 6 बजे मुख्यमंत्री भूपेश बघेल ‘‘हिंदी के लोकतंत्र’’ विषय म आयोजित दू दिवसीय आनलाइन अंतरराष्ट्रीय वेबिनार म शामिल होही अउ साल भर चले वाला जयंती समारोह के वर्चुअल उद्घाटन करही। समारोह के आयोजन छत्तीसगढ़ मित्र पत्रिका डहर ले संस्कृति विभाग के मदद ले करे जात हावय। ए मउका म मुख्यमंत्री श्री बघेल हिंदी के वरिष्ठ साहित्यकार अउ भारतीय भाषा परिषद् के अध्यक्ष डा. कुसुम खेमानी के साल 2021 के पंडित माधवराव सप्रे छत्तीसगढ़ मित्र साहित्यिक पत्रकारिता सम्मान ले सम्मानित करही। डॉ. कुसुम खेमानी के वागर्थ पत्रिका ल सरलग प्रकाशन, भारतीय भाषा परिषद् के माध्यम ले हिंदी के अतुलनीय सेवा अउ साहित्यिक योगदान के खातिर सम्मानित करे जात हावय। 

समारोह म मुख्यमंत्री श्री बघेल पंडित माधवराव सप्रे म केंद्रित छत्तीसगढ़ मित्र के विशेष अंक अउ एक पुस्तक के विमोचन भी करही। ए मउका म देश के वरिष्ठ संपादक श्रवण गर्ग हिंदी पत्रकारिता के लोकतंत्र विषय म मुख्य वक्तव्य देही। वेबिनार के पहिली सत्र के अध्यक्षता कुलपति डॉ. केशरी लाल वर्मा करही। ए सत्र म डॉ. सुशील त्रिवेदी, बुल्गारिया ले डॉ. आनंद वर्धन शर्मा, नार्वे ले डॉ. शरद आलोक अउ भोपाल ले श्रवण गर्ग विचार व्यक्त करही। 20 जून के बिहनिया 11: 30 बजे ले आयोजित सत्र म केऊ विद्वान मनला हिंदी नवजागरण, हिंदी के आधुनिकता उक विषय म व्याख्यान के खातिर आमंत्रित करे गे हावय।