रोशन साहू के गजब सुघ्घर रइपुरिहा ददरिया ‘चांदी के सांटी’ के सोशल मीडिया म धूम

सिनेमा। छत्तीसगढ़ी म सुघ्घर-सुघ्घर गीत आजकल सोशल मीडिया म गजब धूम मचावत हावय। करमा, ददरिया के संग फोक पैरोडी के तको भरमार होगे हावय, फेर आरूग लोक गीत अउ संगीत के अपन अलग दुनिया हावय जेन कभू नइ बिसर सकय। लोकगीत ल मया मिलते रेहे हावय, अऊ आगू तको मिलही। ए महीना सोशल मीडिया म एक रइपुरिहा अंदाज म ददरिया सुने बर मिलत हावय ‘चांदी के सांटी’। ये गीत ल गाये हावय रोशन साहू अउ मुनमुन चक्रवर्ती मन, शब्द रचना तको रोशन साहू के हावय जेना मधुर संगीत म बांधे हावय प्रबीर पुरोहित ह। 

साफ सुथरा मनोरंजक गीत के मया करइया मन ये गीत ल गजब पसंद करत हावय। दुयेच हप्ता म ये गीत 2 लाख दर्शक तक पहुंचगे हावय। वीडियो अउ फिल्मांकन के बात करे जाए तव वहू गजब के हावय। रोशन साहू के मार्गदर्शन म कोरियोग्राफर संदीप सिंह ह नृत्य ल मनभावन बनाये म कोनो कसर नइ छोड़े हावय। भावाभिनय करत दीपक साहू अउ तनूजा पाटिल के अभिनय तको लाजवाब हावय। गीत अउ संगीत रस म सराबोर दुनों कलाकार मन सुघ्घर प्रस्तति दे हावय। तनुजा अउ दीपक दुनों झिन ह पारंपरिक पहनावा म घातेच फभत हावय, उंकर जोड़ी तको गांव-गोड़र के टुरी-टूरा कस चुक ले हावय। दूबर देह के बांका टूरा अउ मोटियारी अकन गोरी नारी टूरी के डांस ल देखके तो खेती-खार, नरवा-डोड़गी संग धरती-अकाश झूमर गे हावय।   

ददरिया केऊ किसम के गाये जाथे फेर सबो ह मया अउ मयारू ल पिरित म चिभोरेच के उदीम करथे। ये गीत थोकन अलग किसम के हावय, बोल म कुछ खास ठेठपन नइये, मया करइया मनला अपन बात ल साफ-साफ केहे हावय। एक प्रकार से केहे जाए तो ये रइपुरिहा अंदाज के ददरिया आए। संगीत तको बिकट धमक के बाजे हावये जेमा तबला, निसान, मोहरी अउ बंशी के धुन ह लोगन लोकांचल म बरोय के माद्दा रखथे। सुने म अइसे लागथे के सुनतेच राहा..., अउ देखे म तो एक पइत म नजर नी भरे। अइसन गीत मनला घेरी-बेरी देखे सुने के मन करथे। संगवारी मन तको देखव अउ जम के शेयर, लाइक अउ कमेंट करव।     

देखव गीत के बानगी - 

• लड़की - चांदी के सांटी लगे हावय बाती गा...2, सजना मया कभू झन छूट जाही ना...2 
• लड़का - माटी के दीया लगे हावय बाती वो...2, सजनी मया कभू झन छूट जाही ना...2 
• लड़की - जोन घड़ी देखेव तोला, 
• लड़का - सुरता आथे काबर मोला 
• लड़की - मया के हावय बंधना.... सजना मया कभू झन छूट जाही ना।
• लड़की - पलना कस बइहा तोरे झूलत रइथव मै हा गा, काया हावय तोरे पूनवा मया के छहहा गा 
• लड़का - मुंदे रइबे आंखी तैहा, 
• लड़की - कइसे जीहा मैं हा...मया के हावय बंधना, सजना मया कभू झन छूट जाही ना।
• लड़का - आंखी म ते कजरा खोपा म ते गजरा वो, नइतो छोड़व संगी कतको करले झगरा वो 
• लड़की - पिरित के डोरी संगी, 
• लड़की - पिरित के पलना वो, मया के हावय बंधना... सजना मया कभू झन छूट जाही ना।

चांदी के सांटी - Chandi Ke Saati - Roshan Sahu - Munmun Chakravarti - CG Song 2021

Song : Chandi Ke Saati

Singer  : Roshan Sahu - Munmun Chakravarti

Lyrics : Roshan Sahu 

Music :  Prabir Purohit 

Artist : Deepak Sahu - Tanuja Patil

R : Saptak JhanKar Studio

Camera And Edite - Gaurav Sahu

Choreographer  : Sandip Sinh

Graphics : Punesh Sahu

Director : Roshan Sahu

Producer : Lakhi Sundrani

Youtuber : Punesh Sahu

Language : Chhattisgarhi 

Genre : Regional

Produced by : SUNDRANI ENTERTAINMENT

Creation : "Hamar Chhattisgarh Ki Prastuti" Lokkala Manch MO. 79992 14639