ग्राम पंचायत स्तर के कोविड नियंत्रण कक्ष ल अगस्त तक रखे के निर्देश

अंजोर.धमतरी, 2 जून 2021। कलेक्टर जय प्रकाश मौर्य ह आज बिहनिया कलेक्टोरेट सभाकक्ष म बइठक लेवत जिला स्तरीय अधिकारी मन ले गोठबात करिन। कलेक्टर ह बइठक म अइसे सबो अधिकारी जेला कोरोना के टीका लग चुके हावय, ओला एन्टीबॉडी टेस्ट कराये ल किहिन, जेकर ले वो भविष्य के खातिर सतर्क रिहि। ओमन मुख्य चिकित्सा अउ स्वास्थ्य अधिकारी डॉ. डी.के.तुर्रे ल येकर खातिर बेवस्था करे के निर्देश दे हावयं। ओमन गांव पंचायत स्तर म कोविड रोकथाम कक्ष ल अवइया अगस्त महीना तक क्रियाशील रखे म बल दे हावय, जेकर ले गवई क्षेत्र म संदेहात्मक अउ लक्षणात्मक लोगन के कोविड टेस्ट समय म हो सके अउ लोगन ल कोविड के टीका लगाये के खातिर भी प्रेरित करे म सुविधा होवे। 

ओमन कोविड मरीज मन के खातिर होम आइसोलेशन के नियम के कड़ाई ले पालन सुनिश्चित कराये अउ टीकाकरण ल पूरा गंभीरता ले चलाये सबो अनुविभागीय अधिकारी राजस्व, मुख्य कार्यपालन अधिकारी जनपद पंचायत ल निर्देशित करिन हावय। कलेक्टर ह सीजी टीका पोर्टल म 18-44 साल के लोगन के पंजीयन के खातिर करे गे बुता ल भी सहराइन। ओमन सबो नगरीय क्षेत्र म कोरोना हॉटस्पॉट क्षेत्र के चिन्हांकन करे के निर्देश आयुक्त अउ मुख्य नगरपालिका अधिकारी मन के दे हावयं। संगे उहां एक समे म अधिकतम पांच लोगन के प्रवेश, कोविड एप्रोप्रियेट बिहेवियर अपनाने के खातिर व्यापारी मनके बइठक लेके समझाइश दीस। 

बैठक म कलेक्टर ह निर्देशित करिन के अब राजस्व न्यायालय सरलग तौर म शुरू करे जाएं। राजीव गांधी किसान न्याय योजना के तहत प्रदेश सरकार डहर ले फसल चक्र परिवर्तन के प्रोत्साहित करे खरीफ सीजन म धान के बदला आन फसल जइसे सुगंधित धान, फोर्टिफाईड (जिंक, प्रोटिन) धान, आन लघु धान्य फसल जइसे कोदो, कुटकी, रागी, दलहन, तिलहन लगाये म दस हजार रूपिया प्रति एकड़ के अनुदान मदद मिलही। कलेक्टर ह किसान मनके बीच येकर व्यापक प्रचार प्रसार करे के निर्देश उप संचालक कृषि के दे हावयं। कलेक्टर ह किहिन के अवइया सोमवार के राजीव गांधी किसान न्याय योजना अउ गोधन न्याय योजना के प्रगति के समीक्षा वी.सी. के ज़रिये करे जाही।