सुराजी पुरखा जगन्नाथ बघेल के नाती बहु श्रीमती ईश्वरी बघेल ल मिलिस पीएचडी के उपाधि

अंजोर.रायपुर, 21 जून 2021। देश के आजादी म अपन जबर योगदान के संग, अलग छत्तीसगढ़ राज बर क्रांति के जोत बरइया पावन ग्राम पथरी म अब उच्च शिक्षा के अलख जगावत सुराजी परिवार के नवा पीढ़ी समाज सेवा के बुता करत हावय। मिले आरो के मुताबिक स्वतंत्रता संग्राम सेनानी जगन्नाथ बघेल जी के नाती बहु श्रीमती ईश्वरी बघेल पति अमित बघेल ल समाजिक विज्ञान संकाय के अंतर्गत अर्थशास्त्र विषय म पंडित रविशंकर विश्वविद्यालय ह पीएचडी (डाक्टरेट ऑफ फिलॉस्फी) के उपाधि प्रदान करे हावय। 

उंकर शोध बुता के विषय "न‌ई कृषि तकनीक हस्तांतरण का किसानों के आर्थिक और सामाजिक विकास पर प्रभाव का विश्लेषणात्मक अध्ययन" जोन रायपुर जिला के अंतर्गत धरसीवां विकासखंड के संदर्भ म आधारित रिहिस। ये शोध बुता ल ओमन डॉ. आर.एन. सिंह, प्राचार्य शासकीय दिग्विजय महाविद्यालय राजनांदगांव के मार्गदर्शन म पूरा करे हावय। पथरी ग्राम के सुराजी परिवार के बहु डॉ. ईश्वरी बघेल अभी रायपुर के कंचनगंगा डंगनिया म रिथे अउ वर्तमान म शासकीय उच्चतर माध्यमिक विद्यालय सेजबहार रायपुर म व्याख्याता के पद म कार्यरत हावय।