खेती के खबर : नवा तकनी‍क बर बाढ़त किसान के रूझान, पैडी ट्रांसप्लाटर मशीन ले होवथे रोपाई

अंजोर.रायपुर, 25 जून 2021।छत्तीसगढ़ राज्य के ज्यापदातर क्षेत्र म अभी के बेरा म छिटका (बाड कास्टिंग) पद्धति के माध्यम ले धान के बुआई करे जात हावय। ए परंपरागत पद्धति म जिहां बीजहा के खपत जादा होथे उहें निदाई, गुड़ाई, कटाई उक म परसानी होथे। कृषि बुता बर मजदूर के सरलग होत कमी ल देखत किसान मन के रूझान अब पैडी ट्रांसप्लाटर मशीन ले धान के रोपाई के बर बढ़त हावय। 

कृषि विभाग के संचालक यशवंत कुमार ह बताइन के राज्य शासन के कृषि विभाग डहर ले किसान मन के पैडी ट्रांसप्लांटर मशीन ले धान रोपाई के खातिर प्रोत्साहित करे के बुता करे जात हावय। ए आधुनिक पद्वति ले धान रोपाई के खातिर पूरा छत्तीसगढ़ राज्य के सबो क्षेत्र के सबो वर्ग के किसान मन के प्रति हेक्टेयर के दर ले साढ़े सात हजार रूपिया के अनुदान दे जात हावय।

अपर संचालक कृषि अभियांत्रिकी जी.के. पीड़िया ह बताइन के पैडी ट्रांसप्लांटर मशीन ले धान के रोपाई के खातिर क्लस्टर के रूप म किसान मनके चयन करे जात हावय। एक क्लस्टर न्यूनतम 4 हेक्टेयर के होना चाही। एक किसान के अधिकतम 2 हेक्टेयर सीमा तक अनुदान के पात्रता रइही।

रायपुर जिला के तिल्दा विकासखंड के गनियारी के किसान श्रीमती मेधनी वर्मा अपन खेत म पैडी ट्रांसप्लांटर मशीन के माध्यम ले रोपाई करवात हावय। येकर खातिर ओमन अपन खेत म करीब 15 दिन पहिली नर्सरी तइयार कराये हावय। इही रकम ले रायपुर जिला के संग संभाग के सबो जिला अउ दुर्ग संभाग के कबीरधाम, राजनांदगांव उक म भी किसान लाभांवित होत हावय। 

योजना ले लाभांवित होए अउ योजना के जानकारी बर संभागीय कृषि यंत्री कार्यालय या जिला के उप संचालक कृषि कार्यालय म संपर्क करे जा सकत हावय। योजना के उद्देश्य राज्य म उन्नत तकनीक ले धान रोपाई ल प्रोत्साहित करना अउ रोपाई के रकबा म बड़वार करना हावय। येकर ले जिहां धान उत्पादन म बड़वार होही उहें कृषि मजदूर के समस्या के निदान होही अउ बीजहा के बचत होए के संग निंदाई, गुड़ाई, कटाई उक म सहुलियत होही।