अंजोर.महासमुंद, 14 जून 2021। जिला महासमुंद पुलिस डहर ले अवैध गांजा परिवहन के विरूद्ध सरलग कार्यवाही जारी हावय। इही म आज अवैध मादक पदार्थ के एक बड़ा खेप महासमुन्द होवत उत्तर प्रदेश अउ दिल्ली तनि जावया ल पकड़े हावय। मिले आरो के मुताबिक देवेन्द्र सिंह पिता रमेश चन्द्र सिंह जाति गडरिया उमर 30 साल निवासी हीरपुर थाना गोंड़ा जिला अलीगढ़ अउ गुड्डु पिता बलबीर सिंह जाति जाटव उमर 25 साल निवासी बाढ़ोना थाना लोधा जिला अलीगढ़ यूपी ल 10-10 किलो के पैकेट म गांजा वजनी 11 क्विंटल कीमती 2,20,00,000 रूपिया संग पकड़े हावय। पुलिस के बताती अवैध मादक पदार्थ गांजा एक ट्रक म लोड करके खरियार रोड़ ले होवत महासमुंद तनि आये के आरो रिहिस।
जेमा तुरते पुलिस अधीक्षक महासमुन्द डहर ले थाना कोमाखान प्रभारी सिद्धेश्वर प्रताप सिंह ल लघियात कार्यवाही करे बर निर्देशित करिन अउ खरियाररोड़ कोति ले टाटा के 06 चक्का ट्रक क्रमांक UP 81 CT 3412 महासमुन्द तनि आत गाड़ी ल टेमरी नाका के पास घेराबंदी करके पकड़े गिस। आरोपी मन पुलिस ले बांचे के खातिर कटहल के नीचे छीपा के गांजा ले जात रिहिस। कटहल ल हटाये के देखे म नीचे बोरी म भराये 10-10 किग्रा के पैकेट म भरे कुल 1100 किलो मादक पदार्थ गांजा मिलिस। वाहन म अवैध गांजा परिवहन करत पाये जाये म मउका म दुनों आरोपी मन ल गिरफ्तार करके 11 क्विंटल गांजा के वाहन सहित जप्त करे गिस। आरोपी मनके विरूद्ध धारा 20बी एन.डी.पी.एस. के तहत आगे के कार्यवाही करे जात हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।