एसो के साल म एक लाख पोषण बाड़ी बनही

अंजोर.रायपुर, 24 जून 2021। चालू खरीफ सीजन म उद्यानिकी विभाग डहर ले राज्य म एक लाख पोषण बाड़ी विकसित करे जाये के लेके तइयारी शुरू कर दे गे हावय। ये बाड़ी मनके विकास के खातिर उद्यानिकी विभाग के मैदानी अमला डहर ले हितग्राही मन के चयन गउठान विकास बर चिन्हित गांव म कलस्टर के रूप म करे जा चुके हावय। चयनित हितग्राही मन ल पोषण बाड़ी विकास योजना के तहत फलदार पौधा, आने-आने रकम ले के सब्जी के बीजहा उद्यानिकी विभाग डहर ले उपलब्ध कराये जाही। उद्यानिकी विभाग के नर्सरी म बड़े रूप म नींबू, अमरूद कटहल, मुनगा उक के पौधा तइयार करे गे हावयं, जेमा ले लगभग 15 लाख पौधा मन के वितरण पोषण बाड़ी विकास योजना के तहत लाभान्वित हितग्राही मन के रोपण के खातिर उपलब्ध कराए जाही।

इहां ये जानबा होवय के छत्तीसगढ़ सरकार के नरवा, गरूवा, घुरूवा, बाड़ी कार्यक्रम ले उद्यानिकी विभाग डहर ले किसान मनके निवास के तिर म उपलब्ध होही अउ बाड़ी विकास के बुता पोषण बाड़ी विकास योजना के तहत करे जात हावय। राज्य म बीते दू साल म ए योजना के तहत ग्रामीण किसान मन के घर के तिर म स्थित भूमि म दू लाख बाड़ी के विकास करे जा चुके हावय, जेकर ले ग्रामीण अंचल म सब्जी के उत्पादन ल बढ़ावा मिले हावय। ए साल एक लाख बाड़ी अउ विकसित होही। बाड़ी विकास योजनांतर्गत प्रति बाड़ी एक हजार रूपिया के प्रावधान करे गे हावय। जेमा ले खरीफ मौसम म 346 रूपिया कीमत के फलदार पौधा मन अउ 250 रूपिया कीमत के सब्जी बीजहा हितग्राही मन ल उपलब्ध कराए जाही।