विकास उपाध्याय के सियानी म महंगाई के विरोध म टाटीबंध हाइवे जाम

अंजोर.रायपुर, 18 जून 2021। देश म महंगाई के मार ले सबो आम जनता हलाकान हावय। पेट्रोल, डीजल, गैस के संग खाये-पिये के जिनिस के दाम तको घातेच बाढ़ते हावय। देश के बड़का नेता कोनजनि का सूर म हावय ते, एको चेत नइ करत हावय आम जनता के। का बड़हर, का छोटे मनखे सबो ल महंगाई ह जियानत हावय। फेर आजकल देश म अइसे दिन आगे हावय के नेता मन अपने पार्टी के आंखी मुंद के सोर बगराये म लगे रिथे, चाहे कुछू हो जाए। इही हाल आज देश म भाजपा के सरकार करत हावय, पार्टी के कार्यकर्ता एको आखर नी बोलत हावय। इही मन विपक्ष म रिहिस त गजब काओ-काओ करे रिहिस।

आजकल आम जनता के परेशानी ल देखत छत्तीसगढ़ के कांग्रेस पार्टी ह प्रधानमंत्री ल मंहगाई कोति चेत कराये बर प्रदर्शन करत हावय। राजधानी रायपुर म विधायक विकास उपाध्याय के सियानी म महंगाई के विरोध म सांकेतिक चक्का जाम टाटीबंध हाइवे म करे गिस जेमा घंटा भर ले हजारों ट्रक के पाहिया थमे रिहिस। मोदी सरकार के खिलाफ महंगाई ल लेके ओसरी पारी सरलग आंदोलन ल जारी रखने के आह्वान करे गे हावय। कांग्रेस कोति ले तेल अउ गैस सिलेण्डर के बढ़त कीमत ल लेके सैकड़ों बाईक, कार ल घसीटत बीजेपी कार्यालय ले जात रिहिस। छत्तीसगढ़ म बीजेपी सरकार रिहिस त डॉ. रमन सिंह ह तेल के कीमत म वृद्धि होए ले सायकल म चलके विरोध करे रिहिस, फेर आज अतक बिकराल होए के बाद भी कलेचुप हावय।