शासकीय मेडिकल कालेज हॉस्पिटल पेण्ड्री सरी सुविधा के संग 16 जुलाई ले होही सुरू

अंजोर.राजनांदगांव, 22 जून 2021। कलेक्टर तारन प्रकाश सिन्हा ह कोविड-19 के तीसरा लहर के तइयारी ल धियान म रखत 16 जुलाई 2021 ले शासकीय मेडिकल कालेज पेण्ड्री के सरी सुविधा के संग सुरू करे के निर्देश दे हावयं। कलेक्टर श्री सिन्हा ह आज कलेक्टोरेट सभाकक्ष म बसंतपुर स्थित मेडिकल कालेज ल पेण्ड्री म स्थानांतरित करे के संबंध म स्वास्थ्य विभाग के बइठक लिस। ओमन किहिन के कोरोना संक्रमण ले लड़े के खातिर युद्ध स्तर म बुता करे जाना चाही। पेण्ड्री म हॉस्पिटल शिफ्ट करना पहिली प्राथमिकता हावय। 

ओमन किहिन के पेण्ड्री शासकीय मेडिकल कालेज हॉस्पिटल के 16 जुलाई ले सरी सुविधा के संग सुरू करे जाए। हॉस्पिटल म जीवन रक्षक दवई मन के उपलब्धता सुनिश्चित रहय। भवन म जेन सुविधा के कमी हावय, ओला शिफ्ट होए के पहिली पूरा करें। शासकीय मेडिकल कालेज डीन डॉ. रेणुका गहिने ह शिफ्टिंग म होवइया समस्या के बारे म जानकारी दीस। कलेक्टर श्री सिन्हा ह समस्या ल दूरिहा करे के खातिर विभाग ले समन्वय करके समाधान करे के निर्देश दिस।

कलेक्टर श्री सिन्हा ह किहिन के शासकीय मेडिकल कालेज हास्पिटल पेण्ड्री म स्थानांतरित होए के बाद भी बसंतपुर स्थित जिला चिकित्सलय म स्वास्थ्य सुविधा जारी रइही। जुन्ना अस्पताल म कोविड-19 के तीसरी लहर ल धियान म रखत 100 बिस्तर कोविड केयर सेंटर बनाये जाही। ओमन कोविड-19 टीकाकरण के समीक्षा करत किहिन के येकर खातिर सरलग बुता करें। मोबाईल मेडिकल यूनिट के माध्यम ले घना जनसंख्या वाला ठऊर मन म जाके लोगन के टीकाकरण कराएं। येकर खातिर टीम बनाके लोगन ल प्रेरित करें।